- Publika iha: 23 Agosto 2011
Xefe Departementu Farmasia Ministeriu Saude (MS), Antonio Ximenes, hateten ministeriu sei fo sansaun ba klinika sira ne’ebe fa’an aimoruk la ho reseita doutor nian tanba bele fo impaktu ba ema nia saude.
Nia hato’o kestaun ne’e relasiona ho Klinika Privadu balun fa’an aimoruk la ho reseita doutor nian e dalabarak komunidade sira bainhira moras, sosa deit aimoruk iha klinika sein reseita husi doutor ruma e ida ne’e bele afeta ba sira nai saude.
“Tanba ne’e ami hatun lei ne’e, la’os atu bandu klinika privadu sira labele fa’an aimoruk, liu-liu aimoruk antibiotika no malariabiotika maibe tenke tuir lei, tenke ho reseita doutor nian, se la’e ami sei haruka sira selu multa,” hateten Xefe Departementu Farmasia, Antonio Ximenes, semana kotuk iha Kaikoli, Dili.
Tuir lei nu.2/2011/IVGC/MS, koalia kona-ba bandu klinika sira atu fa’an aimoruk antibiotika no malariabiotika sein reseita doutor, MS sei fo sansaun ba sira.
“Selu multa iha kategoria 3, primeiru kuandu kontra maka’as, sei multa $5.000, 00, ladun selu $3.000, 00 no kman liu sei multa $1.500, 00, iha lei ne’e laiha xamada atensaun, maibe kuandu sira kontra nafatin mak ministeriu sei taka klinika ne’e,” Antonio reforsa.
Tuir nia, lei ne’e tenke implementa hodu regula aimoruk nia kualidade no efetivu husi aimoruk rasik, se la’e ema bele halo manipula tun sa’e.
“E kopia lei ne’e ami hato’o ona ba iha klinika privadu sira ne’ebe eziste iha rai laran nune’e sir abele kumpri tuir lei ne’e e ami halo enkontru regular ho sira koalia kona-ba revizaun ba lei ne’e,” nia dehan tan.
Tuir nain ba klinika privaduida iha Dili, “Ministeriu saude fo ona informasaun ba ami katak ba klinika privadu hotu-hotu nebe ejiste iha teritorio laran tomak tenki tuir dekreto lei no 2/2011/IVGC/MS, koalia kona ba kontra bandu faan aimoruk antibiotika no malariabiotika nebe lao ho reseita tuir lei, ida nee ministeriu saude fo ona informasaun mai ami nia klinika nee katak fulan-fulan ami mos tenki halo relatorio ba ministeriu saude kona ba ita nia pasiente sira nebe mai hola aimoruk antibiotika no malaria biotika tenki reseita tuir lei, I agora nee ami sempre halo relatorio ba ministeriu saude para labele deskonfia ba ami nia klinika nee,” hateten Chon Chiefind nudar xefe klinika privadu Chinese and Western Medical Centre, iha Dili.
“Ami senti ba klinika privadu sira nebe faan aimoruk antibiotika no malariabiotika diak liu tamba dala ruma ita ba fasilidade saude mais nunca iha mudansa ba moras nebe ita hetan ida nemak ami konkorda ba klinika privadu sira nebe ejisti iha timor leste, oinsa sira bele iha koperasaun diak ho ministeriu saude atu bele halao knar iha Timor Leste para comunidade sira bele asesu mos ba sira nia asistensia no hetan tratamentu diak ba sira nia klinika refere,” Florinda Da Silva nudar comunidade Caicoli hateten.