Terça, Maio 21, 2024
Total visitors: 766366

Membru Parlamentu Nasional konsidera Ministeriu Agrikultura e Peska (MAP) laiha sentidu nasionalismu hodi fahe trator ba agrikultor sira tanba trator balun sei abandona iha fatin balun.

“Iha prova katak trator barak mak sei tau hela iha Don Bosco Comoro ne’eba, depois ami mai koalia iha ne’e sira ba kalan ida tomak lalin hotu tau fali iha edifisiu Ministeriu Agrikultura nia kotuk,” preokupa Deputadu Inacio Moreira, semana kotuk iha Parlamentu Nasional.
Tuir Morreira katak, durante ne’e diskunfia MAP fahe trator ba agrikultor sira la justu “Tanba iha informasaun barak ne’ebe tama mai iha ne’e katak sira fahe tuir kor partidu nian, tanba ne’e hau dehan sira laiha sentidu nasionalismu,” nia dehan.
Entretantu Prezidente Komisaun D Parlamentar, Brigida Coreia hateten trator hirak ne’e seidauk fahe tanba sei hein proposta husi agrikultor sira.
“Tuir informasaun ne’ebe hau simu husi Sekretariu Estadu Marcos da Cruz, katak trator 20 ne’e sei hein agrikultor sira hatama proposta mai, foin bele fahe,” nia dehan.
Nia esplika, trator hirak ne’e balun monta kompletu ona e balun mos seidauk “Tanba ne’e husu ba Ministeriu Agrikultura atu trator ne’ebe nia pesa seidauk kompletu bele halo kompletu ona,” nia husu.
Enkuantu total trator ne’ebe MAP sosa ho orsamentu estadu 2011 nian hamutuk 2.500, maioria distribui tiha ona ba grupu agrikultor sira.
“Hela ne’e kala iha 20 hanesan ne’e iha Comoro tanba ita presiza verifika tan proposta sira ne’ebe hatama husi grupu agrikultura, foin bele fahe ba sira,” hatan Sekretariu Estadu Agrikultura e Arborikultura, Marcos da Cruz.
“Ita labele fo ba ema ne’ebe mak hela iha foho leten , labele fo ba ema ne’ebe la iha natar maibe tenki fo ba ema ne’ebe iha natar no forma grupu,” nia dehan tan.