- Publika iha: 06 Janeiro 2012
Ospital Referral Distritu Oe-cusse durante semana rua nia laran fo asistensia saude ba pasiente uza lilin tanba ospital laiha gazolina atu fo naroman ba ospital ne’e.
“Foin dadaun hau simu mensagen ida ne’ebe hau fahe ba membru governu no Parlamentu katak ita nia Ospital Referral Oe-cuse semana rua laiha gasoline. Doutor no infermeiru sira tenke servisu ho lilin. Ne’e failansu bo’ot ida,” hateten Prezidente ba Republica Ramos Horta foin lalais iha Palasio Prezidensial iha Aitara Laran, Dili.
Iha parte seluk Director Geral Ministerio Saúde, Agapito da Silva Soares, hateten katak problema falta konbustivel laos Ospital Referral Oe-cusse deit maibe kuaze iha ospital referral seluk iha teritorio tomak.
DG Soares hateten tan katak Ministerio Saúde (MS) sei responde problema ne’e ho kupon ne’ebe MS iha.
“Distritu Oecuse hasoru duni dificuldade, ne’e falta gasolina tanba atu sosa deit iha liur mos laiha ho ida ne’e mak durante semana ida sira infrenta falta konbustivel ami (MS) foti inisiativa ida atu koalia ho pretamina Atambua no konsege haruka duni 10 mil litrus ba servisu distritus saúde. Ba centru saúde sira haruka 5 Mil litrus no ospital 5 mil litrus ita hein katak 5 mil litrus ne’e bele aguenta to’o fin ano se la to’o ita koko atu supporta nafatin,” hateten DG Soares foin lals(1/12) iha salaun Institutu Nasional Saude, MS, iha Comoro, Dili.