Quarta, Fevereiro 19, 2025

Fundasaun Mahein (FM) halo recomendasaun ba Governu atu kria ka harii paiol atu rai kilat, tanba PNTL ladun disiplina iha sira nia knar wainhira uja kilat.Fundasaun Mahein (FM) halo recomendasaun ba Governu Timor-Leste atu kria ka harii paiol atu rai tamba durante ne’e Polisi Nasional PNTL nia ajentes ladun displina iha sira nia knar wainhira uza kilat.

“Tamba ne’e mak ami  rekomenda Governu tenki kria sistema armazen ida ne’ebe oinsa Polisi Nasional Timor-Leste sira bainhira la servisu, kilat  tenki hatama ba armazen e kuando lori sai mos tenki iha regra ida; hakerek nia nomor hira mak lori sai o atu ba halo saida,” hateten Director FM, Nelson Belo, foin (2/12) iha knar fatin Balide, Dili.


Tuir Director FM Belo hateten tan katak dala ruma ajentes PNTL sai husi servisu ou  loron ne’ebe feriadu sira lori kilat no tuir los tenki iha ordem especial ida ne’ebe hateten katak sira la servisu ka bainhira feriadu kilat tenki hatama ba iha paiol PNTL ne’e.


“Atu nune’e bele kontrola kilat ne’ebe maka sai no kilat ne’ebe sira lori sai ne’e uza ba saida. Labele lori sai kilat arbiru deit bainhira pesoal Polisi Nasional Timor laos tempo servisu. So uza deit iha tempo servisu deit.”


Iha parte seluk komunidade ne’ebe la kohi identifika nia identidade hateten katak Governu tenki utuliza armazen ka fatin rai kilat iha kada eskuarda ka estasaun polisia nian iha rai laran nos mos iha armazen nasional sira atu nune’e labele fo oportunidade ba membru PNTL sira lori sai kilat liu oras servisu nian.
“Hau hakarak hateten katak tamba durante ne’e ita hare katak polisi sira uza kilat iha tempo ne’ebe laos servisu nian e bainhira feriadu sira kontinua nafatin kaer kilat,” nia haktuir.
TDW koko atu konfirma asuntu ne’e baiha Komando Jeral PNTL maibe reprezentante la pronto atu koalia ho media.