- Publika iha: 06 Janeiro 2012
Vise Prezidenti Parlamentu Nasional, Maria Paixao, hateten katak politika Estadu nian kontinua atu dezenvolve kondisaun no respeitu ba Direitus Humanus iha rai laran.
“Ita labele hateten, iha Malae barak mai iha ne’e hateten katak Timor la iha Direitus Humanus mas ita rona iha sira nia nasaun baku malu, sunu malu,” hateten Vise Prezidente PN Maria Paixao, semana kotuk (9/12), iha PN, Dili.
Tuir Vise Prezidente Paixao katak nasaun hotu-hotu sempre iha krime oituan oituan maibe Estadu Timor-Leste kontra tebe-tebes abuzus Direitus Humanus.
“Agora sei iha oknum-oknum populasaun nebe komete krime ida para halo violensia ba iha populasaun, ida ne’e ita tenki kombate liu husi Lei Konvensaun nebe ita aprova tiha ona fo mae nia direitu ba iha nasaun ida ne’e nia laran,” Paixa hato’o [ida ne’e signifika said?].
Iha fatin hanesan Deputadu Mario Viegas Carascalao hateten katak dala barak ita koalia konaba Direitus Humanus maibe nia implemetasaun seidauk implementa didiak iha Timor-Leste.
“Se ita hare deit konsekuensia mai husi funu nian uluk, hanesan Indonesia nian mos vitimas barak seidauk hetan reparasaun no mos pur ezemplu krize 2006 nian seidauk hetan reparasaun,” hateten Deputado Carrascalao.
Nia hatuta tan katak violasaun sira ne’e laos Governu mak viola maibe Governu seidauk iha biban atu bele repara.
“Ita hare deit relatoriu ne’ebe mai husi CAVR [Komisaun Akolhimentu Verdade no Rekonsiliasaun] nia hakerek iha livru Chega, vitima bara-barak seidauk hetan,” Deputado Carrascalao tenik.
Deputadu haktuir tan katak to’o agora ema barak seidauk hetan justisa.