Quarta, Fevereiro 19, 2025

Relasiona ho programa graduasaun ba estudantes medisina 500 resin ne’ebe UNTL realiza, Prezidente da Republika, Jose Ramos Horta optimista katak iha tinan 2016 Timor Leste sei sai nasaun ne’ebe iha doutor numeru a’as per kapita iha rejiaun Sudeste Aziatiku.Relasiona ho programa graduasaun ba estudantes Medisina nain 500 resin ne’ebe Universidade Nasional Timor Lorosae (UNTL) realiza iha semana kotuk (28/11) liu ba no iha tinan kotuk, Presidente da Republika (PR), Jose Ramos Horta optimista katak iha tinan 2016 Timor-Leste sei sai nasaun ne’ebe iha doutor numeru aas per kapita iha rejiaun Sudeste Aziatiku.


“Iha 2016 ita sei iha doutor mediku rihun ida ne’ebe sei remata estudu iha UNTL no iha Kuba. Ho numeru ida ne’e ita sei iha numeru doutor mediku per kapita ne’ebe aas liu iha Suseste Asiatiku tomak,” dehan PR Ramos Horta iha palacio Prezidensial Aitarak Laran, Dili, semana kotuk (28/11).


PR Ramos Horta hatutan katak ida ne’e mak susesu ne’ebe Timor-Leste hetan tanba uluk iha tinan 2002 bainhira simu knar atu ukun rasik, nasaun hetan dezafiu bo’ot ida tanba laiha doutor jeral ida no menus nain-profesional saude. Maibe agora Timor-Leste iha ona mediku jeral no nain-profesional saude ne’ebe bele fo asistensia ba povu tomak.


Nia mos katak realidade ne’ebe iha mak foin lalais UNTL halao graduasaun ba estudantes medisina nain 54 ne’ebe durante tuir kursu iha UNTL durante tinan ne’e no sai nudar doutor jeral ne’ebe bele halao knar iha distritus no sub-distritus ne’ebe presiza atu hetan asistensia mediku sira nian.
Nune’e mos iha tinan 2012 mai Timor oan atus lima resin iha fakuldade Medisina iha UNTL sei remata no halao knaar hadia tratamentu saude iha baze.


Iha parte seluk chefe interim ba programa nacional HIV/SIDA, Marta Abenia Dos Santos, hateten katak intervensaun ne’ebe Presidente da Republika optimista katak iha tinan 2016 Timor-Leste sei aumenta doutores barak ne’e kestaun ne’ebe diak ba ministerio saúde maibe doutor sira ne’e presiza treinamentu espesifiku ba moras sira ne’ebe afetado iha nasaun laran.
“Doutores agora dadaun iha rai laran barak maibe  doutor ne’ebe atu atende espesifiku ba moras HIV/SIDA ne’e sei limitado tebes ne’eduni ho doutor sira ne’e bele sei aumenta iha tinan 2016 ita espera katak husi doutor sira ne’e bele iha balun ne’ebe atende lolos ba moras HIV/SIDA nuene’ bele ajuda doutor sira ne’ebe iha ona bele atende moras sira ne’ebe afetado iha ita nia rai,” Marta espera, (6/12) iha centru Juvenil Taibesi.


Nudar Timor oan tenke optemista katak iha Tinan 2016 Timor –Leste sei sai husi moras oioin ne’ebe afeta ba povu nia moris liu husi doutor Timor oan sira ne’ebe agora dadaun governu Timor-Leste liu husi ministerio saúde forma ka prepara ona.