Dezembru, rehabilitasaun Stadium Munisipal remata

Tuir Manajer Kompania Montana Diak, Abiu Salsinha katak prosesu rehabilitasaun ba Stadium Munisipal agora atinji ona pursentu 65 no sei remata iha Dezembru tinan ne’e.
“Ami hein du’ut mai para atu kuda tuir dezenu ne’ebe mak iha, agora ami konsentra ba tribun ba segundu etapa ne’ebe mak iha, garis ligasaun ninian. Maske rehabilitasaun ne’e la’o neneik maibe importante liu tenke iha kualidade ne’ebe diak no ami garante katak iha fulan Dezembru nia laran bele hotu ona,” hateten Abiu Salsinha semana kotuk (19/09) iha nia servisu fatin  Akait, Dili.

Tuir nia, rehabilitasaun Stadium  sei  halo tuir standar internaisonal nain tanba ne’e hotu ka la hotu ne’e responsabilidade kompania nian.
Salsinha hatutan, total  orsamentu ne’ebe sira hodi manan tender ne’e hamutuk US$ 630,00 resin.
Iha parte seluk  Aju nudar Mandor  ba projetu ne’e hateten stadium municipal agora aumenta tan tribun 2. “Tribun rua ne’e husi sor-sorin inklui kuda du’ut iha kampu laran,”nia katak.
Nia dehan traballador ne’ebe servisu ba rehabilitasaun ne’e, kahur malu entre ema Indonezia no Timor oan.
IHa sorin seluk tuir traballador Domingos Alves deskontente ho slaariu ne’ebe sira hetan tanba kiik liu. “hetan deit US$ 90,00 fulan ida, ne’e la sufsiente ba ami nia moris,”nia preokupa.