- Publika iha: 21 Setembro 2011
Tuir membru Parlamentu Nasional katak hahalok baku ema no oho ema, sunu uma no asaltu ema ne’e krimi, tanba ne’e sei deit mak involve iha kazu hanesan ne’e tenke prosesa tuir lei.
“Satan polisia mak baku fali ema, konsidera polisia mos halo krimi no tenke prosesa sira tuir lei kodiku prosesu penal ne’ebe iha,”hateten Deputadu Adriano do Nascimento, semana kotuk (06/09) iha Parlamentu.
Xefe bankada Partidu Demokratiku (PD) hato’o kestaun ne’e relasiona ho membru polisia ne’ebe ba halo operasaun ba kazu Zumalai iha sub-distritu Zumalai,distritu Covalima hodi baku joven no autoridade local hodi buka tuir autor kriminozu sira ne’ebe oho membru PNTL ida no sunu komunidade sira nia uma iha fatin ne’eba.
Tuir nia, polisia tenke hala’o nia servisu ho professional, tenke implementa lei no orden tuir nia dalan labele halo atuasaun arbiru ba ema inosente sira.
Entretante membru Komisaun B Parlamentar, Deputadu Paulo Fatima Martins sente triste ho hahalok membru polisia balu ne’ebe halo violasaun direitu humanu ba populasaun sira.
“Hau triste bainhira simu informasaun husi joven no Xefe Suku balu iha Zumalai, katak membru polisia balu husi komanda operasaun baku fali sira, lei la fo dalan,” nia dehan.
Eis Komandante Jeral Polisia Nasional Timor-leste (PNTL) ne’e hatutan, lei fo dalan ba polisia sira atu hola medidas defensive bainhira ema halo ataka hasouru polisia “maibe kuandu ema entrega aan ona labele baku fali ema tanba polisia nia servisu mak atu proteze no prevene krimi,”nia katak.
Deputadu ne’e mos husu ba sira ne’ebe sai vitima atu hato’o keixa formal liu husi Administrador Sub-Distritu, Administrador Distritu, Komanda PNTL Distritu, Komando Jeral PNTL, Sekretariu Estadu Seguransa, Ministru Defeza no Seguransa, PN no Ministeriu Publiku, nune’e bele halo prosesu justisa ba membru polisia hirak ne’ebe viola direitus humanu.
Tuir nia, iha pais demokratiku sidadaun hotu-hotu tenke respeitu autoridade sira, no entre autoridade sira mos tenki respeita malu, tanba autoridade local hanesan Xefe Suku, iha lejitimidade tanba eleitu husi povu.
“Kualker operasaun no atividade saida de’it mak hala’o iha komunidade sira nia le’et, tenke respeita no koordena ho autoridade lokal sira, atu nune’e dezenvolvimentu bele la’o ba oin,”nia afirma.
Entretantu Komandante Jeral PNTL Komisariu Longuinhos Monteiro hateten husi operasaun ne’e konsege ona kaptura suspeitu na’in 32, nain 17 submete ona ba iha prosesu identifikasaun no 15 submete ba prosesu investigasaun.
“No espera katak iha loron sira tuir mai sei kaptura tan suspeitu balu ne’ebe seidauk konsege kaptura,”nia esperansa.