- Publika iha: 21 Setembro 2011
Tuir membru Parlamentu Nasional katak iha Outubru Orsamentu Jeral Estadu (OJE) 2012 nian tama ona iha Parlamentu atu halo diskusaun tanba tuir lei fulan 3 antes orsamentu anu fiscal remata, orsamentu jeral foun tenke tama fali.
“Ami hatene katak tuir programa ne’ebe iha,fulan Outubru orsamentu jeral estadu tama ona iha Parlamentu atu halo debate,” hateten Deputadu Francisco Jeronimo, semana kotuk (02/09) iha PN.
Maske nune’e, Deputadu ne’e la satisfas tanba tinan-tinan sempre aprova orsamentu ne’ebe bo’ot maibe iha implementasaun ladun iha rezultadu.
“Ita bele dehan desde 2007 to’o 2011 pur volta miliaun 3 resin maibe rezultadu la’o ba kotuk mak barak liu,ita hare estrada balun kuak kontinua ,ita hare dada airin kontinua maibe ahi kontinua mate nafatin,”nia observa.
Entretantu tuir Deputada Brigida Coreia husi bankada CNRT, katak Orsamentu Jeral du Estadu 2012 nian iha 15 Outubru tama ona iha PN.
“Maibe ita sei hare, tanba tuir kalendariu Outubru diskuti ona durante fulan ida, no antes tama Natal,parlamentu tenke aprova ona,”Brigida dehan.
Alende ne’e Deputadu Arao Noe hateten, tuir kalendariu normalmente orsamentu jeral du estadu foun debate ona iha Parlamentu iha Outubru kada tinan.
“‘Tanba ne’e mak tuir informasaun ne’ebe mak Governu hato’o mai iha Parlamentu katak, Governu sei kumpri kalendariu ne’e,’’ nia dehan.
Arao afirma, orsamentu jeral du estadu tenke aprova molok tama ba eleisaun atu nune’e preparasaun ba eleisaun bele la’o ho diak.
“Tama iha 28 Novembru orsamentu jeral 2012 nian aprovadu tiha ona para bele fasilita STAE ho CNE hodi bele prepara ho diak liu tan ba eleisaun Prezidensial,”nia katak.