- Publika iha: 16 Setembro 2011
Relasiona ho partidus ki’ik sira ne’ebe agora dadaun mosu barak, tuir Deputadu Mario Carascalao katak ne’e gasta deit osan subsidiu ne’ebe governu fo ba parpol sira.
“Hau hanoin sira buka supa deit osan estadu nian, gasta osan ho la iha funan no la iha rendimentu,” hateten Deputadu Mario Viegas Caracalao, semana kotuk iha PN.
Tuir nia, partidu kiik sira ne’ebe mosu ne’e estraga sira nia votu. “Diak liu votu oituan-oituan ne’e tau hamutuk ba interese komun nian, tanba it abele iha diferensia opiniaun maibe ita hotu luta ba interese nasional,”nia katak.
Tuir Eis Vise Primeiru Ministru ne’e nia hare katak,maske partidus bar-barak mosu maibe seidauk avansadu no sei atrazadu.
Entretantu Diretor Ezekutivu Lalenok Ba Ema Hotu (LABEH),Christoper Hendry Samson hateten ohin loron mosu partidus barak tanba lei fo dalan.
“Ita adopta sistema multipartidaria, katak ema hotu bele kria partidu to’o atus ida ka atus rua,laiha problema,”nia dehan.
Tuir nia, atu festa demokrasia la’o ho diak la’os tenke partidus hotu kria plata forma unidade maibe tenke hare liu ba ideolojia.
“Ne’ebe hau hanoin ita lalika tauk tanba partidus barak sei kria instabilidade iha eleisaun tinan oin maibe povu mak deside hodi hili partidu ida ne’ebe xave ba sira,”nia katak.
Atu labele kria partidus bar-barak, tuir Christoper Parlamentu presiza kria lei ida ho criteria ne’ebe todan no iha misaun no vizaun ne’ebe mak diak.
“Ita nia populasaun ladun barak maibe partidus bar-barak, povu konfuzaun,”nia dehan.