- Publika iha: 16 Setembro 2011
Sekretaria Estadu Promosaun e Igualidade (SEPI), Idelta Maria Rodrigues hateten pursentu 50 (50%) feto iha distritu 4 moris ho vida agrikultura no peska.
Bazea ba rezultadu peskiza ne’ebe halo iha Fevereiru-Jullu 2011 iha Distritu 4 mak, Distritu Viqueque, Manatuto,Ermera no Distritu Bobonaro, hatudu katak feto barak mak moris ho vida agrikultura hanesan halo natar no to’os nomos peska nian.
“Hau hanoin rezultadu ida ne’e diak atu fortifika liu papel no sai mata dalan ba Ministeriu Agrikultura no Peska (MAP) no iha instituisaun sira seluk ne’ebe interesante liu ba area hirak ne’e,”hateten SE.Idelta Maria Rodrigues, semana kotuk iha salaun Auditorium Liceu,Dili.
Tuir nia, Distritu 4 ne’e reprezentante husi leste nian ida , parte oeste nian ida no husi sentru ida, hodi hare lolos feto nia partisipasaun iha Agrikultura ne’e iha ne’ebe , saida mak sira bele kontribui , no oinsa mak sira hola parte iha vida politika agrikultura ne’ebe hetan rekonesementu husi mane sira atu servisu hamutuk.
“ Ita hatene katak feto sira halo servisu iha Agrikultura barak liu, sira nia kontribuisaun bo’ot tanba ne’e mak ita atu hare katak se mak halo servisu barak liu no oinsa ita atu konsolida hamutuk atu rekonsilia para entre mane ho feto sai parseiru ida atu bele atinji objetivo ne’ebe ita hotu hakarak,” nia dehan.
Nia afirma. Total orsamentu ba peskiza ne’e rasik kuaze $80 e tal mil ba iha tekniku sira ne’ebe akompania peskiza durante sira halo viazen e orsamentu ne’e apoia husi Governo Norwegia.
Iha fatin hanesan, Ministru Agrikultura e Peska, Mariano Assanami Sabino, promote katak nia parte sei hadia politika, liu-liu oinsa mak bele rekonese no suporta partisipasaun feto iha vida agrikultura.
“Ita koalia kona-ba jeneru,ita koalia kona-ba rekonstrusaun dezenvolvimentu iha igualidade no uza liberdade no mos iha valor atu kesi ita sai ema ne’ebe iha valor e ami sei hare oinsa mak bele iha igualidade entre feto ho mane iha agrikultura nian,” nia dehan.
Nia parte mos rekonese katak feto nia servisu barak liu kompara ho mane.”Alende sira halo natar, to’os, fila mai uma sira tein, hare labarik sira no servisu seluk ne’ebe hein hela sira iha uma,”nia rekonese.
Entretantu tuir fonts konfirmadu ne’ebe la kohi fo sai nia identidade kompletu, katak realidade hatudu katak feto halo servisu hanesan ho mane liu-liu iha vida agrikultura nian.
“Hau kontente tanba ida ne’e mos fo valor duni ba feto sira nia dignidade tamba ervisu ne’ebe mane sira halo la’os mane deit mak halo maibe iha parte seluk hatudu katak ita feto mos bele,” nia katak.