Kondutor sira ne’ebe kontra sinais tranzitu sei multa $30

Tuir Xefe Seksaun Cek Poin Polisia Tranzitu Distritu Dili,Arlindo dos Santos katak ba kondutores sira ne’ebe kontra sinais tranzitu nian sei multa $30,00.

“Tanba ne’e husu ba motorist sira hotu, tantu mikrolet, taxi inklui  kondutor transporte privadu atu respeita ba sinais tranzitu ne’ebe mak polisia no DNTT tau tiha ona, ho nune’e bele salva imi nia vida,” hateten Arlindo dos Santos semana kotuk iha  Akademia Polisia Comoro,Dili.
Tuir nia, sira  sempre halo cek point, maibe karik iha cek point ne’e kondutor balun kontra sinais tranzitu sei hetan sansaun. “Sira sei selu multa $30,00,”nia katak.

Enkuantu ba motor sira ne’ebe mak halai sala hodi kontra sinais tranzitu iha 20 e agora prende tolu ne’ebe laiha dokumentus inklui motor govenru nian  ida ne’ebe tesi plat sei ba selu iha Diresaun Nasional Transporte e Terestres (DNTT).

“Depois de selu tiha iha ne’eba mak mai aprezenta fali  sira nia dokumentus iha Kuartel Jeral, foin bele foti sira nia motor,”nia esplika.

Nia hatutan, iha tinan kotuk sira ne’ebe kontra sinais tranzitu multa $9,00 e agora sa’e $30,00, laiha dokumentus 3 dolar no laiha karta kondisaun selu $24,00.

Iha parte seluk motorista ne’ebe kontra sinais tranzitu nian, ne’ebe lakohi  fo sai nia identidade, rekonese katak nia sala no prontu atu simu sansaun.

“Hau nia dokumentus kompletu, tantu SIM no dokumentus motor nian maibe hela hotu iha uma e momentu ne’e hau urjenti, hau lori konvite atu ba hatama iha edukasaun rejional II, entaun hau buka dalan korta kontra sinais tranzitu tanba ne’e hau simu saida mak polisia haruka,”nia rekonese.