Sexta, Junho 14, 2024
Total visitors: 766366

Atu prepara aan ba iha eleisaun jeral 2012,ohin loron partidus barak rama-rame halo konsolidasaun hodi konsolida sira nia militante sira iha baze,maske nune’e tuir membru Parlamentu Nasional katak iha eleisaun tinan oin laiha  partidu ida mak sei manan absoluta.

“Sei laiha partidu ida manan ho maioria absoluta, maibe maioria simples tantu partidu Fretilin no CNRT nudar partidu primeiru no segundu,”hateten Deputadu Mario Viegas Carascalao no Deputada Gertrudis Moniz, semana kotuk iha Uma Fukun,Dili.
Tuir sira, Partidu Sosial Demokrata (PSD) no Partidu Demokratiku (PD) sei halo komprimisiu hodi halo koaligasaun ho partidus seluk antes eleisaun tanba esperiensia iha eleisaun jeral 2007,koaligasaun PSD ho ASDTantes eleisaun maibe depois de eleisaun hamosu fali dualisme iha Parlamentu.

“PSD sei halo koligasaun ho Partidu ne’ebe deit mak hetan asentu iha Parlamentu Nasional (CNRT, Fretelin PD, etc) depende ba negosiasaun depois elisaun,”Mario dehan.

Nia hatutan,partidu sira asentu iha PN, tinan-tinan hetan subsidiu husi Governu, husi 2008-2010 trez milloes, no fahe ho proporsional tuir kadeira ida-idak, no iha tinan ida nee deit (2011), orsamentu aumenta ba trez milioes, PSD hetan 200.000, no partidu ne’ebe hetan barak liu mak Fretelin no CNRT.

Entretantu tuir Deputadu husi bankada Congresu Nasional Rekonstrusaun Timor (CNRT), Arao Noe katak sira nia partidu oras ne’e preparadu atu kompete iha eleisaun jeral 2012 ho demokratikamente no garante sei manan absoluta. “Tanba estrutura iha baze (suku to’o aldeia) metin tiha ona kompara ho eleisaun 2007, maibe karik manan ho maioria simples,CNRT sei  hola pozisaun hanesan opozisaun pozitivu iha Parlamentu hodi fo apoiu ba partidu ne’ebe kaer ukun hodi halao dezenvolvementu nasaun nian,”nia dehan.

Maibe karik manan ho absoluta, programa prioridade CNRT nian mak  implementa Planu Estratejiku Dezenvolvementu Nasional (PEDN) hodi liberta povu husi mukit.enkuantu kona-ba publikasaun kandidatu ba eleisaun tinan oin, sei publika iha Kongresu NasionalCNRT nian iha Janeiru 2012 “Se se,seidauk hatene klaru,”.

Enkuantu Diretor Ezekutivu Programa Monitorizasaun ba Sistema Judisial (JSMP), Luis de Oliveira Sampaio hateten parrtidus sira bainihra halo konsolidasaun ho sira nia militantes sira tenke ho dignidade no ho maturidade.

“Labele konsoliadasaun hanesan fali kampana, tempu seidauk to’o no labele uza linguajen politiku sira ne’ebe iha indikasaun atu insulta malu, hodi kria ambiente politika ne’ebe ladiak tanba objetivu husi ukun aan ida ne’e mak ita jere rasik ita nia nasaun no riku soin sira hodi dzenvolve povu no nasaun ho diak,” nia katak.

Tanba ne’e husu ba Comisaun Nasional das Eleisaun (CNE) fo atensaun ba partidu politiku sira atu labele ultrapasa tempu (tempu kampana),partidu ida-idak tenke respeita regras demokratiku ne’ebe iha.

Entretantu Komisariu Komisaun Nasional Eleisoins (CNE) José Belo hateten, tuir  Konstituisaun RDTL artigu 7 fo dalan ba multi partidaria iha Timor Leste hodi halo Partidu barak mak mosu, no agora dau-daun iha Partidu 22, rejistradu no prontu hodi partisipa iha elisaun jeral 2012.

Belo hatutan, tuir lolos Partidu seidauk to’o 22, tanba tuir lei numeru 3/2004 kona-ba Partidu Politika, ida-idak tenki iha ideolojia ne’ebe diferenti, maibe iha realidade iha Partidu balu sira nia ideolojia ne’e kuaje hanesan deit, hodi impaktu ba lei ne’e rasik hodi la funsiona ho diak hodi regula Partidu Politiku sira.

Belo dehan, tuir Lei Numeru Seis (6) konaba subsidiu Partidu Politik define klaru hodi fahe ho proporsional, no iha tinan ida ne’e (2011) subsidiu aumenta ba Tres Miliaun, no fahe kadeira ida sei hetan USD$ 45 mill, no ba Partidu sira ne’ebe lahetan asentu iha Parlamentu Nasional, so hetan deit osan subsidiu kampaina Trinta Mil ($. 30.000).

Hari Partidu hanesan Loke Kios

Prezidenti Republika Jose Ramos Horta perokupa tebes ho partidu barak hanesan loke kios, ne’e laos haburas demokrasia maibe halimar ho  demokrasia hodi hetan subsidiu husi Governu.

Maibe Xefe Estadu iha esperansa nafatin, elisaun 2012, Partidu hotu-hotu kontribui ba elisaun  bele lao diak no transparensia no rejultadu elisaun hotu-hotu tenki simu.

Iha fatin ketak, Manuel Neto, husu ba Partidu Politik sira ne’ebe iha kampaina halo komprimisiu bar-barak, kuandu manan tenki realiza duni promesa hirak ne’e, hodi dezemvolve Timor Leste ba oin no hadia povu nia moris.

Neto hatutan, Partidu Politik sira tenki rona no respeitu malu, no disiplina hodi organiza no orienta militante no simpatizante sira tuir orientasaun Partidu Politik ida-idak nian, no labele soran povu.