Sexta, Junho 14, 2024
Total visitors: 766366

Negosiante Roda tolu (R3) ne’ebe mak durante ne’e fa’an iha Palacio Governu oin to’o Lesidere hein hela promesa husi Xefe Estadu kona-ba atu harii uma ida-idak ba negosiante sira maibe to’o agora laiha rezultadu.

“Iha fulan kotuk Prezidenti rasik mai koalia ho ami katak,’hau sei planu halo uma ida-idak ba imi sira fa’an gerobak, atu nune’e imi bele fa’an imi nia sasan,” hateten negosiante R3, Sergio dos Reis, semana kotuk iha Akait,Dili.
Tuir Sergio, Xefe Estadu fo sai promesa ne’e bainhira halo vizita ba fatin ne’eba iha lorokraik ida no kalan tuku 11:00.

“Iha kalan ne’e kedas Prezidenti rasik hateten mai ami katak ‘aban dader hau mai tan koalia ho imi ,maibe dadersan  ami hein to’o agora Prezidente nunka mai’,”Sergio dehan.
Entretantu Juliao Belo, negosiante mos, katak iha fulan Abril liu ba Prezidenti rasik ba hasoru sira dala rua ,hateten ba sira dehan atu halo uma ba sira maibe ate agora laiha rezultadu.

“Prezidenti mai koalia ho ami dehan hanesan ne’e ‘ hau kalan-kalan liu husi imi nia oin, imi toba deit iha rai la iha uma, ema ne’ebe mai husi liur toba fali iha uma, “Belo lembra.

Iha fatin hanesan Eldito Freitas nudar mos negosiante R3 iha fatin ne’eba, haforsa katak xefe Estadu promesa duni katak sei halo uma ba sira.”promesas hirak ne’e loos hotu tanba iha momentu Prezidente koalia liafuan ne’e hau mos fa’an hela iha Palasiu Governu oin,”nia tenik.