- Publika iha: 04 Fevereiro 2025
Eleisaun ba suku foun iha Munisípiu ualu (3) ne'ebé realiza iha dia 25 Janeiru ne'e rezultadu hatudu katak iha suku sanolu-resin-tolu (13) manan 100% no iha suku 5 avansa ba eleisaun segundu ronde.

Diretór Jerál Sekretariadu Tékniku Administrasaun Eleitoral (STAE) Elviro Fernandes Moniz dehan, foin lalais ne'e governu estabelese tan suku foun hamutuk 18 iha Munisípiu ualu (8) hanesan, Aileu, Ermera, Baucau, Lautém, Manatuto, Manufahi, Vikeke, RAEOA.
Nia dehan, rezultadu eleisaun ne'e xefe suku eleitu hamutuk 13 mak hanesan Munisípiu Aileu mak suku (Karahili, Hurai-Raco), Munisípiu Ermera (Koilate-Leten, Asu-Lau), Munisípiu Baucau (Makasae, Kanada, Builai, Ueromata) Munisípiu Lautém (Badur), Munisípiu Manatuto (Laku-Mesak), Munisípiu Manufahi (Tahu-Bein), Munisípiu Vikeke (Makadiki, Uaitame, Makadiki Baixu).
"Ita iha suku lima (5) mak sei avansa ba eleisaun suku segundu ronde mak hanesan, Kutete, Mone Meko iha RAEOA, Poetete-Lodudu, Peotete-Vila Munisípiu Ermera no suku Iliheu Munisípiu Manatuto," nia dehan.
Nia dehan, ba suku lima (5) ne'ebé mak hakat ba segundu ronde dadaun ne'e prepara hela hodi hasoru eleisaun suku segundu ronde ne'ebé sei realiza iha fulan Fevereiru mai.
"Suku 13 ne'ebé eleitu ona dadaun ne'e prepara ona hodi hili lia-nain no joventude feto no mane iha dia 5 de Fevereiru," Diretór Jerál STAE Moniz informa.
Enkuantu suku foun hirak ne'e estabelese tuir lei suku númeru 19/2023 ne'ebé previstu iha artigu 91 fo kompetensia ba Ministériu Administrasaun Estatal (MAE) hodi kria suku foun.
Entretantu Diretór Sekreadu Tekniku Admistrasaun Eléitoral Munisípiu Manatuto Mariano Natalino Soares da Silva dehan, iha Manatuto estabelese tan suku foun rua hanesan, Iliheu no Laku-Mesak.
"Suku rua-ne'e mak suku Laku-Mesak Xefe Suku eleitu mak Luis Mendonça no suku Iliheu hakat ba segundu ronde," nia informa.
Nia dehan, husi suku Laku-Mesak iha kandidatu na’in-tolu mak hanesan, Francisco do Santos ho votus 100, Jose Godinho Gonçalves Carceres ho votus 120 no Xefe suku eleitu Luis Mendonça ho votus 878.
Enkuantu suku Iliheu iha kandidatu António Soares ho votus 183, Jentelino Gonçalves Soare, ho votus 169, Francisco Paulo Soares ho votu 342, husi kandidatu na’in-tolu ne'e iha na’in-rua mak hakat ba segundu ronde mak António Soares no Francisco Paulo Soares.