- Publika iha: 04 Fevereiro 2025
Ministériu Agrikultura Pekuária Peska no Floresta (MAPPF) liuhusi Diresaun Veterinária kontinua halo kampaña vasinasaun ba animál sira iha munisípiu, tanba ne'e husu ba komunidade sira atu sulan animal sira-ne’e atu nune’e fasil hodi halo vasinasaun.

Diretora Nasionál de Veterinária (DNV) Joanita Bendita Jong hateten, ekipa halo hela kampaña iha munisípiu sira hodi halo vasinasaun ba animal sira atu nune’e labele kona moras.
"Ami-nia ekipa sira iha munisípiu agora halo hela sira-nia servisu iha terenu hanesan halo hela kampaña hodi fahe informasuan ba komunidade sira no halo mós vasinasaun ba animal sira liuliu karau atu nune’e moras labele kona. Tanba ne'e ami husu komunidade sira ne’ebé iha animal tenke sulan, atu nune’e ekipa veterinária ba fasil halo vasinasaun," dehan Diretora Nasionál Veterinária Joanita Jong iha MAPPF, Komoro, Díli.
Nia hatutan, ekipa veterinária halo kampaña hodi fahe informasuan ba komunidade sira ne’e tanba, komunidade sira ne’ebé hela iha area rurais ne’e balun sedauk hatene, servisu veterinária nian.
Nia salienta, vasinasaun ba animal sira ne’ebé MAPPF halo ne’e gratuitu la selu, maibé komunidade sira mak tenke sulan sira-nia animal atu nune’e fasil atu halo vasinasaun.
Nune’e mós Diretora Agrikultura Munisípiu Ainaro, Aguida Judit Mendonça hateten, ekipa veterinária sira halo hela vasinasaun ba animal sira liuliu karau.
"Ekipa Veterinária iha munisípiu Ainaro sira halo hela vasinasaun ba animal sira liuliu karau, no sira hamutuk ho autoridade munisípiu sira halo mós sensiblizasaun hodi fahe informasuan ba komunidade sira, tanba komunidade balun seidauk hatene programa ne’e mai husi Ministériu Agrikultura Pekuaria Peska no Floresta, liuhusi servisu veterinária nian," dehan Diretora Agrikultura Munisípiu Ainaro.
Nia hatutan, komunidade sira ne’ebé iha animal ne’e tenke kesi, atu nune’e bainhira ekipa husi veterinária ba vasina fasil hodi halo vasina.
"Komunidade sira iha Munisípiu Ainaro ne’e barak mak animal husik de’it, tanba ne'e husu para sira atu kesi animal sira para fasil ba veterinária sira hodi halo vasinasaun," nia dehan.
Nia salienta, animal barak mak halo vasinasaun ona, liuliu karau sira, maibé balun seidauk vasina tanba husik de’it.