- Publika iha: 04 Fevereiro 2025
Ministério Coordenador Assuntos Económicos (MCAE), husu ba AIFAESA (Autoridade de Inspeção e Fiscalização da Atividade Economica, Sanitaria e Alimentar) tenke halo monitorizasaun hodi asegura ai-han ne'ebé importa husi rai-liur, atu nune’e bele seguru ba konsumidór sira-nia saúde.

Koordenadór Jerál MCAE, Jorge Martins hateten, AIFAESA tenke kontrola ai-han, ne’e esensial tebes hodi asegura padraun siguransa ai-han ba saúde ema nian.
"AIFAESA nia papel prinsipal mak atu halo inspesaun no monitorizasaun ba ai-han ne'ebé importa haree mós produs lokalmente sira no global, hodi garantia katak ai-han no ai-moruk sira-ne'e seguru ba konsumidór sira," hateten Koordenadór Jerál MCAE iha Salaun CCD, Caicoli, Díli.
Nia hatutan, AIFAESA nia servisu ne’e fundamental tebes ba futuru Timor-Leste nian iha Komersiu global, hodi hadia kualidade produtu ai-han sira hodi kontribui ba kresimentu ekonómiku.
Nia mós salienta, aleinde ai-han AIFAESA mós kontrola ai-moruk sira ne’ebé importa mai Timor-Leste.
Iha sorin seluk, Inspetora Jerál AIFAESA Dra. Odete da Silva Viegas hateten, AIFAESA halo hela monitorizasaun hodi asegura ai-han, no la'ós ai-han.
"Ami durante ne'e halo hela monitorizasaun hodi asegura ai-han importasaun no ai-han lokal sira, la'ós ai-han hanesan ai-moruk sira ba konsumidór sira iha rai-laran de’it, maibé husi rai-liur mós ami halo monitorizasaun hotu, maske hasoru dezafiu oinoin. Maibé vontade atu servisu ne’e mak importante," dehan Odete.
Nia hatutan kontrolu ba ai-han ne’e la’ós AIFAESA mesak mak halo kontrolu maibé envolve mos liña ministériais balun.
"Iha ami-nia implementasaun traballu, ami iha grupu de Traballu ne'ebé envolve mós ho liña ministériais balun," nia afirma.
Iha fatin ketak Akademista Mario Sarmento husi UNTL Fakuldade Agrikultura hateten, AIFAESA halo kontrola ba ai-han sira no la’ós ai-han de’it, maibé sira mós tenke haree mós ai-han sira ne’ebé liuprazu.
"AIFAESA hanesan instituisaun ida ne'ebé halo kontrola ba ai-han sira, maibé sira tenke haree mós loron prazu nian, se ita hatama mai de’it, laharee loron prazu hanesan de'it, ai-han sira mai la to’o fulan ida prazu liu tiha ona, tanba ne’e husu atu kontrola mós hahan sira-ne’e nia prazu," dehan Mario.