Quarta, Fevereiro 19, 2025

Governu Austrália oferese ekipamentu militár hanesan botas hamutuk 1 mil ba Falintil Forsa Defesa Timor-Leste (F-FDTL) hodi utiliza ba servisu loron-loron.

Governu Austrália oferese ekipamentu militár hanesan botas hamutuk 1 mil ba Falintil Forsa Defesa Timor-Leste (F-FDTL) hodi utiliza ba servisu loron-loron.

Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek" dehan, botas sira ne’ebé parseiru Austrália oferese ne'e serve duni ba membru F-FDTL hodi utiliza.

Nia dehan, durante ne'e Governu Austrália apoiu buat barak ba Falintil-Forsa Defeza Timor-Leste (F-FDTL) hanesan insfraestrutura, enjeñaria, formasaun, no ekipamentu seluk tan.

"Ohin Austrália oferese tan ekipamentu militár hanesan botas hamutuk 1 mil ba membru Falintil-Forsa Defeza Timor-Leste (F-FDTL) Tenente Jenerál Falur Rate Laek hatete.

Nia hatete, apoiu ida-ne’e iha signifikadu bo’ot entre Timor-Leste no Austrália atu hametin relasaun entre nasaun rua. Tanba Austrália nu’udar parseria estratéjiku ida ba Timor-Leste, tanba ne’e husu atu nafatin apoia F-FDTL nune’e hamutuk kombate ameasa sira.

“Presiza kontinua halo kooperasaun militár iha Timor- Leste atu prevene ameasa sira, hanesan nasaun viziñu tenke apoia malu nafatin hodi prevene ameasa sira," nia informa.

Nia informa, Austrália nu’udar parseiru estratéjiku ba Timor-Leste. Durante ne’e dezenvolvimentu Forsa Defeza hahú husi Aileu to’o Metinaro to’o ohin loron sira sempre akompaña forsa sira-nia dezenvolvimentu.

Entretantu Adidu Defeza Austrália Kapitaun Mar e Guerra Matthew Richardson, dehan, reprezenta governu Austrália entrega Botas ba F-FDTL.

“Ohin iha Sentru Instrusaun Metinaro ita entrega apoia ne’ebé Forsa armada Austrália fó ba Forsa Defeza Timor-Leste,” nia dehan.

Nia dehan, botas ne’ebé governu Austrália apoia ne’e kualidade di’ak tebes, tanba Austrália rasik mak produz no Forsa Austrália mane no feto uza ba servisu no ezersísiu.

Nia hatete, Austrália kompromete sei apoia nafatin Timor-Leste iha kualker setór liuliu ba Forsa Armada Timor-Leste, atu bele dezenvolve di’ak liutan.