- Publika iha: 28 Janeiro 2025
Ministériu Agrikultura Pekuaria Peska no Floresta (MAPPF) halo aprezentasaun relatóriu Estensaun Agrikola Timor-Leste.

Ministru Agrikultura Pekuaria Peska no Floresta (MAPPF) Eng. Marcos da Cruz hateten, relatóriu refere hanesan matadalan ida ba implemendór servisu Agrikultura hodi halo servisu.
"Relatóriu Estensaun Agrikola ida-ne'e sai hanesan matadalan ba implementadór servisu Agrikultura sira, atu uza hodi orienta sira hodi halo sira-nia servisu," dehan Ministru Marcos, iha salaum MAPPF, hafoin remata aprezentasaun Relatóriu Estensaun Agrikola, Comoro, Díli.
Nia hatutan, Manual ne’ebé aprezenta di'ak, tanba bele ajuda mós agrikultór sira hodi bele hasae sira-nia produsaun iha to'os no natar sira.
"Manual ida-ne'e ha’u haree di'ak, tanba bele ajuda mós ita-nia to’os nain sira atu bele hasa'e sira nia produsaun iha to'os no natar barak ho kualidade atu nune’e bele sustenta sira-nia moris," nia afirma.
Nia salienta, Manual ne’e di'ak ona, tanba ne’e bele uza ona, maibé karik atu hadia di’ak liután bele hadi'a, maibé ne’e bele uza ona.
Nia mós deklara, presiza mós atu servisu hamutuk ho universidade sira hanesan UNTL hodi halo peskiza iha área Agrikola nian.
Iha fatin hanesan Akademista Mario Sarmento husi UNTL Fakuldade Agrikultura hateten, manual refere di'ak, maibé presiza mós halo peskiza klean atu hatene di'ak liután problema ne'ebé mak durante ne’e to'os nain sira hasoru.
"Relatóriu ida-ne'e di'ak, maibé ita mós tenke halo peskiza ida ne'ebé kle'an atu hatene di'ak liután kona-ba problema ne'ebé ita-nia to'os na'in sira hasoru, ita bele hakerek buat barak ho di'ak, maibé ita latun ba haree kondisaun to'os nain sira-nian, ida-ne'e susar," nia dehan.
Aleinde ne’e nia hatutan, komunidade sira halo produsaun barak, maibé kuitadu dala ruma estraga de’it, tanba estrada la di’ak, ema la hola.
"Durante ne'e komunidade sira halo produsaun barak maibé sira han de’it, ha’u senti sira han mós labele, tanba barak liu, sira atu lori ba merkadu faan mós estrada at, entaun produtu sira-ne’e estraga de’it," nia haktuir.
Nia salienta, bainhira governu liuhusi MAPPF hakarak implementa programa sira-ne’e primeiru tenke halo koordenasaun ho liña ministeriais hotu atu nune'e bele kolabora hamutuk, selae mak implementa mós rezultadu ladun di’ak.