Quarta, Fevereiro 19, 2025

Inan faluk Ermelita Buikalai ho oan kiak nain 4 husi suku Goulolo, postu-administrativu Cailaco, munisípiu Bobonaro moris ho kondisaun vulnerável liu no laiha kbiit atu sustenta moris.

Inan faluk Ermelita Buikalai ho oan kiak nain 4 husi suku Goulolo, postu-administrativu Cailaco, munisípiu Bobonaro moris ho kondisaun vulnerável liu no laiha kbiit atu sustenta moris.

"Ha'u-nia katuas oan mate iha tinan 2021 no ha'u hanesan inan faluk ho ha'u-nia oan na’in-haat (4), feto 3 mane-ida, na’in-ida maka eskola no tolu seluk la eskola, tanba haree ba moris ne'ebé mukit tebes no laiha kbiit atu sustenta sira.

Ami han loron kalan mak han hahan lokal sira wainhira laiha, vizinu sira ne'ebé besik maka ajuda, ami moris todan tebes hanesan inan faluk no oan kiak na’in-haat no uma ne'ebé ami hela hetan ajuda konstrui netik husi komunidade sira hodi ami bele hamahan netin an no tahan ami husi anin no loron manas," dehan inan faluk Ermelita.

Nia hatutan, iha oan nain haat ne'e hakarak tebes atu asesu ba edukasaun, maibé moris hanesan inan faluk difisil tebes atu sustenta sira-nia eskola no halo tuir sira hodi atinji sira-nia mehi.

"Ha'u-nia oan sira hakarak tebes atu eskola, maibé atu halo oinsa, se ami-nia moris ho kondisaun ne'ebé difisil tebes. Ha'u hanesan inan ida hakarak tebes atu haruka sira ba eskola, maibé tanba moris hanesan inan faluk no han de’it sei buka ba mai oinsá maka bele sustenta tan sira-nia eskola hodi atinji mós sira-nia mehi.

Inan faluk ne’e husu mós ba nai-ulun sira atu hanoin hodi tau netik matan ba ami ne'ebé moris ho kondisaun difisil tebes ne'e," tenik nia.

Iha sorin seluk Deolindo Leto Siri hanesan xefe aldeia Soiubo, Suku Goulolo hatete, durante nia mandatu rekoñese suku no aldeia ne'e familia vulnerável barak tebes.

"Iha ha’u-nia mandatu tinan ne'e, identifika família vulnerável sira hanesan, balu ho oan no balu laiha oan ne'ebé moris difisil tebes no seidauk iha estadu ida maka fó ajuda ba sira.

Xefe aldeia ne’e dehan, komunidade balun ho kondisaun vulnerável ida-ne'ebé difisil tebes atu asesu ba buat ruma no balu bele book an mais nesesidade araska tebes ka loron ida bele han dala ida de’it.

Nia hatutan, vulnerável ida-ne'ebé difisil liu maka inan faluk Ermelita Buikalai tanba moris ho kondisaun ida diferente tebes.

"Iha aldeia ida-ne'e moris vulnerável tebes maka inan faluk Ermelita Buikalai ne'ebé moris ho nia oan na’in-haat, sira-nia moris difisil tebes, maibé husi parte autoridade foti ona dadus no fó ona ba suku, maibé seidauk iha responde ba preokupasaun ne'e rasik.

Nia dehan, aleinde ne’e atu hein apoiu husi parte estudu nian no autoridade sira, husu mós ba ema balu maka laran luak no interese ho domin atu ajuda hanesan autoridade simu ho agradese.