Quarta, Fevereiro 19, 2025

Deputadu iha Parlamentu Nasionál (PN) husu Sekretáriu Estadu Asuntu Toponómia no Organizasaun Urbana (SEATOU) tenke hasai Komunidade sira ne'ebé okupa uma Portugés nian kapitál Díli.

Deputadu António da Conceição dehan, área sira ne'ebé mak uma Portugés nian ne'e klasifika nu'udar espasu públiku no labele okupa husi komunidade sira.

Deputadu António da Conceição dehan, área sira ne'ebé mak uma Portugés nian ne'e klasifika nu'udar espasu públiku no labele okupa husi komunidade sira.

Nia dehan, área uma sira ne'ebé identifika uma Portuges iha kapitál Díli mak hanesan, Farol, besik ba igreja Motael, konkretamente iha jardím 05 Maio nia sorin.

"Parlamentu Nasionál husu ba Sekretáriu Estadu Asuntu Toponómia no Organizasaun Urbana (SEATOU) atu hasai komunidade sira ne’ebé okupa uma Portugés nian iha área hirak ne'ebé mensiona," nia dehan.

Nia hatete, komunidade ne'ebé okupa uma Portugés iha área sira iha kapitál Díli ne'e balun haris fase hena no habai fali iha iha estrada ninin.

"Ita haree okupante balun ba haris fali iha estrada ninin, no balun haris iha jardim, ida-ne'e hatudu imajen ladi'ak, tanba ne'e tenke hasai," Deputadu Conceição informa.

Nia dehan, SEATOU mós tenke haree asuntu ne'e no oinsá atu rezolve ho komunidade sira molok hasai sira ho dignu.

Entretantu Sekretáriu Estadu Asuntu Toponómia no Organizasaun Urbana (SEATOU) Germano Santa Brites Dias dehan, durante ne'e (SEATOU) tau hela atensaun ba komunidade sira ne'ebé okupa uma Portugés nian.

"Ita sei buka tempu hodi halo diálogu ho komunidade hirak ne'e no idenfika uma-kain hira, mak okupa uma Portugés nian iha Díli laran nune'e bele rezolve," nia dehan.

Nia dehan, komunidade sira-ne'e okupa uma Portugés nian ne'e mós iha hotu tarzetu SEATOU nian, maibé sei servisu etapa por etapa.