- Publika iha: 20 Janeiro 2025
Governu Austrália liuhusi Forsa Armada Austrália konstrui ona armajen armamentu ida ba Komponente Navál hodi asegura arma militar.

Adidu Defeza Forsa Austrália ilha Timor-Leste Kapitaun Mar no Guerre Matthew Richardson dehan, armajen militar ne'e objetivu hodi rai arma Timor-Leste nian liuliu forma Navál nian para prezerva fasilidade militar hanesan, kilat no monisoens inklui armamentu sira seluk.
“Armajen ne'e konstrui husi empreza RMS Australia iha Timor-Leste hahú ninia konstrusaun iha 15 fulan Abril tinan 2024 no termina iha loron 10 Fulan Janeiru 2025 no osan ba projetu konstrusaun armajen millaun rua, ne'ebé finansia husi Forsa Armada Australia," Adidu Defeza Forsa Australia ba Timor-Leste, Kapitaun Mar e Guerra Matthew Richardson hatete.
Nia dehan, armajen armamentu militar ne'e kompleta ho fasilidade adekuadu hodi kontrola fasilidade militar ne'ebé preserva iha laran.
"Ohin ita entrega armajen armamentu, ne'ebé ho kualidade atu prezerva fasilidade militar nian hodi apoiu servisu Komponente Naval nian," nia dehan.
Nia hateten, apoiu ne'e hanesan simboliza kooperasaun iha área militar Timor-Leste ho Austrália atu metin liutan.
“Timor-Leste ho Australia nia relasaun hahú kedan husi funu to'o ohin loron, tanba ne'e atu hametin parseiru kooperasaun ida-ne'e liuhusi Forsa Defeza Austrália apoiu tan Komponente Navál hodi konstrui armajen ba Komponente Navál tuir tempu ne'ebé determina ona.
Ho armajen ida-ne'e Austrália kontinua hato'o ninia prontidaun hodi apoia Timor-Leste iha área militar no área kooperasaun sira seluk," nia informa.
Iha fatin hanesan, Ministru Defeza, Kontra-Almirante Donaciano da Costa Gomes "Pedro Klamar Fuik" dehan, armamentu ne'e importante atu militar sira bele prezerva sira-nia fasilidade militar hanesan kilat, minisioes no kapasete da Guerra bainhira halo misaun ida.
"Obrigadu ba ita-nia parseiru Austrália ba imi-nia di'ak tomak ne'ebé konstrui armajen armamentu ba Forsa Navál, fasilidade ne'ebé modernu no sufistikadu, ha'u hanoin ita kontinua mantein kooperasaun ho Austrália no Indonezia inklui rai sira seluk", nia afirma.
Nia hatete, forsa Timor-Leste sei presiza nafatin parseriu sira-nia apoiu hodi halo dezenvolvimentu ba instutisaun Falintil Forsa Defeza TImor-Leste (F-FDTL).