- Publika iha: 20 Janeiro 2025
Eskola Akademia Múzika Dom Alberto Ricardo Timor-Leste ne'ebé lokaliza iha Fatumeta, tinan ne'e hahú loke ona ba públiku.

Diretór Eskola Akademia Múzika Dom Alberto Ricardo, Padre Domingos Alves dehan, eskola akademia múzika ne'e harii hetan apoiu finanseiru husi Primeiru-Ministru Kayrala Xanana Gusmão hodi harii Akademia Múzika ida iha Timor-Leste.
"Iha 2025 ne'e Eskola Akademia Múzika Dom Alberto Ricardo Timor-Leste hahú loke ona ba públiku hodi bele mai aprende múzika," nia dehan.
Nia dehan, inisiativa harii Akademia Múzika Dom Alberto Ricardo Timor-Leste ne'e hahú dezde tinan 2002, no idéia husi Primeiru-Ministru Xanana, Monseñor Alberto Ricardo (matebian) no Maestro Simião Barreto no konsege realiza ona.
"Ita konsidera ezistensia Eskola Akademia Múzika Dom Alberto Ricardo Timor-Leste importante tebes hodi hanorin joven sira atu hatene hakerek múzika no halo kompozisaun múzika no seluk tan," Padre Alves hatete iha Palásiu Governu, Díli.
Nia informa orsamentu hodi harii eskola ne'e ho montante millaun $1,685 no konstrusaun rasik realiza durante tinan hitu (7), tanba hasoru difikuldade oin-oin, maibé konstrusaun refere inaugura ona iha dia 6 Dezembru tinan 2024 no dadaun ne'e hahu loke ona ba públiku.
"Dadaun ne'e ita iha ona aplikante na'in neen-nolu (60) mak hakarak aprende múzika, toka violino, piano, flauta no instrumentu seluk tan," Diretór Eskola Akademia Múzika Dom Alberto Ricardo Timor-Leste Alves dehan.
Enkuantu eskola ne'e rejistu ho osan $10 kada fulan selu $30, formador hamutuk na’in ruanulu (20) formandu husi Austrália, Filipina, no Indonézia.
Entretantu Joven Claudensio Esteven Oliveira Mendonça dehan, eskola akademia múzika ne'e di'ak tebes hodi bele fasilita joven sira ne'ebé iha talentu kona-ba múzika bele ba aprende iha ne'ebá.
"Ha'u espera katak liuhusi ezisténsia Akademia Múzika Dom Alberto Ricardo Timor-Leste ne'e foinsa'e barak bele aprende didi'ak oinsá atu bele produz múzika, ida-ne'e mak di'ak no étika, tanba ita haree joven barak mak produz múzika maibé la ho étika," nia esperansa.
Nia hatete, fiar katak liuhusi Akademia Múzika ne'e bele forma joven sira oinsá hakerek múzika ne'e mak loos hodi diverte ema sira ne’ebé mak rona.