ME Ho UNICEF Apoiu Ekipamentu Teknolojia Ba Estudante Munisípiu tolu

Ministériu Edukasaun ho parseiru Fundu Nasaun Unida ba Labarik (UNICEF) apoiu ekipamentu Teknolojia ba estudante sira iha munisípiu tolu (3) hanesan Ainaro, Ermera no Liquiçá hodi fasilita pratika.

Ministra Edukasaun Dulce de Jesus Soares dehan, Ekipamentu Teknolojia, Informasaun no Komunikasaun (TIK) ne’ebé entrega husi UNICEF ba Ministériu Edukasaun hodi apoiu ba eskola iha munisípiu tolu (3) mak hanesan, leptop 32, televizaun 31, tableta 300, jeradór 30, projetór 32.

Nia dehan, ekipamentu hirak ne’e sei fahe ba ensinu báziku hamutuk tolunulu (30) iha Ainaro, Ermera no Liquiçá no estudante benefisiáriu hamutuk 17,469.

"Ekipamentu Teknolojia hirak ne'e ita hetan apoiu husi parseriu Fundu Nasaun Unida ba Labarik (UNICEF) no ita distribui fali ba ensinu báziku hamutuk 30 iha munisípiu Ainaro, Ermera no Liquiçá," nia dehan.

Nia hateten, tablete, internet, no teknolojia seluk bele uza nu’udar maneira atu komplementa pedagojia ne’ebé di’ak, nomós ajuda tebes inkluzaun, tanba fó oportunidade ba labarik sira-ne’ebé presiza prátika tan atu halo online, nomós oferese maneira oioin atu halo akomodasaun ba estudante sira ho difikuldade ka defisiénsia ruma.

“Ohin loron ha’u sente haksolok tebes, tanba bele realiza apoiu ba ekipamentu TIK husi UNICEF ba eskola 30 iha munisípiu Ainaro, Ermera no Liquiçá. Ekipamentu sira-ne'e atu ajuda ho prosesu ensinu-aprendizajen, nomós ho jestaun eskolár," dehan Ministra Edukasaun Soares informa.

Nia dehan, uza IT iha sala-aula tenke ho kuidadu no atu ajuda lisaun sira-ne’ebé enkoraja labarik sira atu halo reflesaun no hanoin ho krítiku no kriativu, la’ós atu hatama estudante sira iha komputadór ka laptop nia oin no husik sira de’it. Ne’e la efetivu, no la’ós maneira atu uza IT ho di’ak.

Iha fatin hanesan, Reprezentante UNICEF iha Timor-Leste, Patricia Digiovanni, hatete, ekipamentu teknolojia ne’ebé entrega dadaun ne’e inklui laptop, printer, jeradór no ekipamentu esensiál sira seluk atu fornese ba estudante sira iha Timor-Leste, hanesan rekursu ne’ebé sira presiza atu hetan susesu iha mundu ohin loron ne’ebé ligadu no kompetetivu.

“Entrega ekipamentu TIK ida-ne’e, hanesan pasu importante ida ba ita atu fó oportunidade hanesan ba labarik sira hotu atu aprende, iha paizajen dijitál ne’ebé mak dezenvolve evolui beibeik, aleinde ne’e estudante ho difisiénsia sira mós sei hetan formasaun kona-ba utilizasaun ekipamentu TIK hanesan mákina braille," Reprezentante UNICEF iha Timor-Leste Digivanni dehan.

Enkuantu nia dehan, ekipamentu TIK ne’e sosa liuhusi apoiu jenerozu husi komité nasionál UNICEF Fransa, VINCI Energies no Wemade Co.Ltd.