Suku Pahalarawain Implementa Ona Tarabandu Maibé Komunidade Balun La Kumpri

Xefe Suku Bahalarawain Postu Administrativu Viqueque, Munisípiu Viqueque Angelo Pinto, dehan, sira implementa ona tarabandu, maibé iha komunidade balun mak la kumpre.

Nia dehan, Suku Bahalarawain iha fulan kotuk implementa ona tarabandu ba animál labele husik, halo to’os tenki halo nia lutu, plantasaun, fatuk no rai-henek.

“Iha fulan kotuk ami halo ona tarabandu atu la bele husik animal arbiru tenke sulan, to’os tenke halo lutu, labele tama ema seluk nia plantasaun, maibé komunidade sira balun la kumpre no kontinua husik nafatin animál,”dehan xefe suku Bahalarawain, iha nia knaar fatin, Buicarin, Viqueque.

Nia hatutan, komunidade sira ne’ebé la kumpre ne’e sei hetan sansaun, hanesan animál husik tama ema nia to’os tenke oho animál no animál na'in tenke selu to’os-na’in nia sasán.

“Komunidade sira ne'ebé la kumpre ne’e sei simu sansaun, hanesan animál husik livre mak tama ema nia to’os estraga ema-nia sasan animál na'in tenke selu ema-nia sasán no oho animál ne’e, foin lalais ami oho ona komunidade balun nia bibi, maibé sira nafatin kontinua husik la'o livre,” nia hateten.

Iha fatin seluk Komunidade Suku Bahalarawain, Andre Gomes hateten, Suku Bahalarawain implementa ona tarabandu, maibé komunidade sira balun la kumpre, hanesan kontinua husik animál la'o livre no estraga mós ema seluk nia sasán.

“Tarabandu iha Suku Bahalarawain ne’e ita tau tiha ona, maibé komunidade balun la kumpre, hanesan animál husik livre nafatin, tuir loos ida-ne’e labele akontese tan, maibé komunidade sira nafatin husik livre, se ita kesi tiha, entaun animál sira-ne’e bele mate hotu, tanba tempu bai-loron du'ut mós la iha, tanba ne’e komunidade sira balun nafatin husi sira-nia animál,” dehan Andre.

Nia hatutan, komunidade sira-ne’e husik livre animál balun iha loron de'it, iha tempu kalan sira sulan tiha, maibé iha komunidade balun mak la kumpre no husik loos de'it, kalan mós la kesi no sulan.

Aleinde ne’e Juventude Suku Bahalarawain Agapito Pinto hateten, Suku implementa ona tarabandu no tau ona regulamentu lubuk ida, tanba ne'e husu komunidade atu koopera, se la kompri mak sei hetan sansaun tuir buat ne’e iha.

"Ita implementa ona tarabandu iha Suku laran, tanba ne'e ba komunidade ne’ebé mak la kumpre mak ami joven sira sei hamutuk ho Suku sei oho animal sira ne'ebé na’in la kesi no la sulan ne’e, ami oho tiha, mak sira la kumpri nafatin mak suku sei implementa multa ba sira tuir buat ne'ebé ita deside ona," dehan Agapito.