- Publika iha: 04 Dezembro 2024
Reprezentante Sentru Saúde Munisípiu Díli (SSMD) Natalino Aleixo hateten, autoridade lokál atu kontrola komunidade sira ne'ebé hela iha foho leten atu nune’e labele soe foer boot arbiru, tanba programa ALFA (Área la Soe Foer Boot Arbiru) hahú implementa ona.
"Autoridade tenke halo kontrolu ba komunidade sira ne'ebé hela iha foho leten hanesan iha Golgota kampung Baru nian, atu sira labele soe foer boot arbiru, tanba agora ita implementa ona programa ALFA, se lae hanesan de'it, ita implementa tia programa ALFA, maibé komunidade kontinua soe foer boot arbiru," dehan.
Iha fatin hanesan, Xefe Suku Comoro Eligio Jose da Silva Marçal, hateten hanesan autoridade lokál sei haruka Xefe Aldeia sira atu halo kontrolu komunidade ne’ebé hela iha foho leten.
"Ami sei halo kontrolu ba komunidade sira ne’ebé hela iha foho leten, tanba ne'e ha’u sei fó atensaun ba xefe aldeia sira atu halo kontrolu ba komunidade sira iha foho leten, tanba ita hatene katak ita agora implementa ona programa ALFA, tanba ne'e presiza halo kontrolu selae hanesan deit ita implementa tiha programa ALFA, maibé komunidade kontinua soe foer boot arbiru ida senti ladun di’ak," dehan Xefe Suku Comoro.
Nune’e mós komunidade Suku Comoro, Arlindo Gomesa hateten, komunidade hela iha foho leten ne'e iha sentina hotu, maibé sira-nia problema bee mak la iha.
"Ami iha ne'e uza hotu sentina, maibé bee mak la iha, tanba dala ruma loron rua tolu hanesan mak bee mai," nia dehan.
Nia hatutan, komunidade sira-ne’e iha ne’e dada hotu bee iha kraik besik gruta Golgota nian ne'e mak sae ba, maibé bee kiik, tanba dada sae fali ba foho letan.