CDU Apoiu SEFOPE Fasilita Kursu Inglés Ba Traballadór Sira Molok Ba Servisu Iha Austrália

Austrália liuhusi Charles Darwin University (CDU) apoiu Sekretáriu Estadu Formasaun Profisionál no Empregu (SEFOPE) hodi fasilita kursu lian Inglés ba traballadór Timor-oan sira molok ba servisu iha Austrália.

Sekretáriu Estadu ba Formasaun Profisionál no Emprego (SEFOPE), Rogério Araújo Mendonça dehan, apoiu ne'e liuhusi Memorandum of Understanding ( MoU), ho Austrália liuhusi Charles Darwin University (CDU) hodi fasilita kursu Inglés ba traballadór sira.

Nia dehan, kooperasaun ba formasaun, ida ne'e atu ajuda Joven sira ba servisu iha rai liur, tanba dalabarak ona traballadór sira ne’ebé ba servisu iha Austrália ladun hatete Inglés.

"Ita koopera ho Austrália liuhusi Charles Darwin University (CDU) hodi apoiu formasaun ba traballadór Timor-oan sira molok ba servisu iha Austrália," nia hatete.

Nia dehan, formasaun ida ne'e sei fó uluk oportunidade ba formadór sira ne'ebé mai husi Sentru Formasaun liu-liu sentru formasaun Akreditadu sira, iha faze dahuluk formadór nain 38 mak sei hetan oportunidade hodi tuir, durante fulan tolu ho balun.

"Ita promete katak sei prepara formasaun ida ne'ebé mak ho kualifikadu duni, formasaun ne'e sei loke husi Charles Darwin University (CDU), iha Timor-Leste iha area Tasi-Tolu, formasaun ne'e orsamentu iha hamutuk montante $2.1 milloens," SEFOPE Mendonça dehan.

Iha fatin hanesan Pro-Vise-Concellor no Xefe Ezekutivu TAFE, Michael Hamilton iha Charles Darwin University dehan, ba oin parte husi Charles Darwin University sei fasilita formasaun lian Inglés ba traballadór Timor-oan sira.

"Formasaun ne'e hodi prepara traballadór sira-nia eskil liu-liu iha lian Inglés atu nune'e sira bele utiliza hodi komunika bainhira ba servisu iha Austrália," nia dehan.

Nia dehan, agradese tebes ba SEFOPE, tanba bele fó fiar ona mai iha Charles Darwin University (CDU) hodi apoiu formasaun lian Inglés ba joven Timor-oan sira.