- Publika iha: 04 Dezembro 2024
Hahú husi fulan Janeiru to'o fulan Outobru 2024, Hospital Rezional Eduardo Ximenes (HOREX) Baucau halo atendimentu ba inan partus hamutuk rihun-ida-atus-rua-lima-nulu-resin-hitu (1257).
Xefe Departamentu Sala Maternidade, Bernardina Freitas Marcal hateten, durante HOREX Baucau halo atendimentu ba inan sira ne’ebé partus barak tebes.
"Hahú husi fulan Janeiru to'o fulan Outubru ne'e HOREX Baucau halo atendimentu ba inan sira ne’ebé mai partus ne'e barak hamutuk 1257, hanesan partus normal ne'e atus-walu-neen-nolu-resin-rua (862), partus ventoza ne'e hamutuk lima-nolu-resin-neen (56) no partus sejariana ne'e hamutuk atus-tolu-tolu-nolu-resin-sia (339)," dehan Xefe Departamentu maternidade HOREX Baucau, iha nia servisu fatin Baucau.
Nia hatutan, inan sira ne’ebé partus normal ne'e partus hotu liu 24 horas bele alta ona, maibé sira ne'ebé partu la normal ne'e liu loron rua no semana ida mak bele bele fila uma.
"Inan sira partus normal hela ne’e liu de’it 24 horas ami haruka alta ona, maibé ba sira ne'ebé partus la normal ne’e tenke baixa lai iha ne’e to’o di’ak mak bele fila ba sira-nia uma," nia deklara.
Nia esplika, inan sira ne’ebé partus la normal tanba dala ruma bebé toba sala, dala ruma inan raan fakar makaas ou dala ruma mós bebé nia korasaun la’o ladun di'ak, ida-ne'e dotor sira tenke buka dalan oinsá para atu salva lalais.
Nia salienta, HOREX Baucau ne'e halo atende ba inan partus sira barak,maibé la’ós de’it husi Baucau, maibé husi munisípiu tolu konsentra hotu iha ne’e, hanesan Lauten, Viqueque, Baucau no Manatuto.
Iha fatin ketak, Koordenadór Postu Saúde Buicarin Abilio Gomes hateten, inan sira ne’ebé atu partus mak pesoal saúde sira susar atu atende, tenke haruka kedas ba Viqueque Villa, ba Viqueque mak la diak haruka liu ba Baucau, tanba Baucau mak iha dotor espesialista barak no ekipamentu ba partus nian mós iha.
"Ami iha ne'e bainhira atu fó partus ba inan ida mak senti nia kondisaun ladun di’ak, entaun ami tenke haruka kedas ba iha Hospitál Sentral Viqueque, ba mak la di’ak tenke ba liu Baucau, tanba iha Baucau ne'e ekipamentu no dotor espesialista sira mós barak, tanba ne'e bele atendementu lalais ba pasiente sira ne’e," nia dehan.
Nune’e mos pasiente Teresa António Marçal hateten, nia partu normal, maibe tanba iha moras balun entaun dotor sira haruka sei baixa lai hodi halo tratamentu.
"Ha’u iha ne’e loron rua, tanba dotor sira dehan iha moras balun ne'ebé iha ne’e lai hodi halo tratamentu ba ha’u-nia moras ne'e bainhira senti di’ak ituan mak bele fila ba uma," nia dehan.