- Publika iha: 04 Dezembro 2024
Governu Ministériu Agrikultura, Pekuária, Peska no Floresta (MAPPF) liuhusi Sekretáriu Estadu Peska no Prezidente Autoridade Munisípiu Díli prepara ona kolan ikan hodi fasilita negosiante fa'an ikan iha merkadu Manleuana.
Diretór Jerál Peska Celestino da Cunha Barreto hateten, kolan ikan ne'e governu prepara hodi fasilita negosiante fa'an ikan sira atu bele fa'an iha fatin ne'ebé mak seguru.
"Ita prepara ona kolan ikan ne'ebé dignu no seguru ba negosiante ikan sira, tanba ne'e ba oin negosiante ikan sira hotu sei konsentra iha merkadu Manleuana hodi fa'an sira-nia ikan no sei la ba fa'an tan iha fatin seluk," nia hatete.
Nia dehan, durante ne'e negosiante ikan sira fa’an iha fatin barak, tanba ne'e MAPPF, halo koordenasaun ho PAM Díli hodi fasilita fatin dignu ba negosiante ikan sira-nia konsentrasaun, kolan ne'e halo konstrusaun ho orsamentu hamutuk $ trinta mil (30.000).
Prezidente Autoridade Munísipiu Díli, Grigorio Saldanha hatete, MAPPF liuhusi Sekretáriu Estadu Peska apoia reabilitasaun kolan ikan no produs zelu fatuk iha merkadu Manleuana hodi fasilita negosiante ikan sira.
"Ita apela maluk sira fa'an ikan iha dalan ninin no balun leba de'it ne'e bele mai fa'an iha Merkadu Manleuana, tanba iha ona fatin seguru ba imi," nia saliente.
Nia dehan, governu prepara fatin ne'ebé dignu no mahon ba negosiante sira ne'ebé fa'an ikan bele mai iha fatin ne'e, tanba maluk balun preokupa kompradór la hola ikan, maibé mai hamutuk fa'an iha ne'e komprador sira sei mai hola fatin ida-ne'e.
"Ha'u aproveita apela Timoroan hotu hadomi ita-nia rai no povu di'ak liu hola maluk sira-nia sasan, ita atu kualidade ho kuantidade ita-nia produsaun sira bele aumenta iha rai-laran," nia dehan.
Nia dehan, governu nia obrigasaun tenke prepara nafatin fatin sira ba negosiante sira iha estrada ninin no balun leba deit bele ba fa’an iha fatin ne'ebé governu prepara ona ho kondisaun dignu.
"Karik imi lakohi mai fa'an ikan iha fatin ne'e, Autoridade Munisípiu Díli sei la autoriza sira iha estrada ninin no fatin sira seluk, tanba sei autoriza sira mai fa'an ikan iha Manleuana, obrigatoriamente sira tenke mai fa'an ikan iha fatin ne'ebé governu prepara ona," informa.