- Publika iha: 01 Dezembro 2024
Ekipa Sekretáriadu Tékniku Administrasaun Eleitoral (STAE) presiza entende kona-ba dizitalizasaun literasia hodi bele fasilita sira-nia servisu iha momentu eleisaun.
Diretór Ezekutivu Belun Luis Ximenes dehan, bazeia ba asesmentu ne’ebé Belum halo iha tinan kotuk, hatudu katak iha momentu eleisaun STAE seidauk iha kapasidade naton hodi bele realiza dizitalizasaun literasia votasaun no oinsa atu haree ba votantes sira no komunika ho media imprensa liuhusi literasia dizital.
"Iha asesmentu ne'e ita haree Sekretáriadu Tèkniku Administrasaun Elèitoral (STAE) seidauk entende di'ak kona-ba dizitalizasaun literasia, tanba ne'e presiza hasa'e sira-nia koñesimentu," nia hatete.
Nia dehan, liuhusi rezultadu asesmentu ne'e mak Belum servisu hamutuk ho Plan Internasionál ho apoiu fundu husi Uniaun Europeia hodi fasilita formasaun literasia dizitalizasaun ba ekipa husi Sekretáriadu Tèkniku Administrasaun Eleitoral (STAE) hodi bele fasilita hala'o sira-nia servisu importante sira iha momentu eleisaun liu-liu iha literasia dizitalizasaun.
"Literasia dizitalizasaun ne'e ekipa (STAE) sira tenke hatene nune'e bele implementa iha eleisaun sira," Diretór Ezekutivu Belun Ximenes dehan.
Nia dehan, espera katak husi formasaun no kapasitasaun ne'e Belun ho parseiru sira fó ba ekipa husi STAE ne'e sira bele entende di-di'ak hodi bele implementa iha futuru.
Entertantu, Diretór Nasionál Sekretáriadu Tèkniku Administrasaun Eleitoral (STAE) Eduardo Casmiro de Deus hatete, dalaruma dizitalizasaun literasia ne'e ema haree buat bai-bain maibé presiza komprende didi'ak nune'e bele implementa servisu.
"Ita hanesan orgaun Tékniku Eleitoral presiza hatente tanba, dalabarak iha ezijensia barak katak informasaun la to'o ka informasaun la naton la klaru ba komunidade, liu-liu inkluzibidade," nia informa.
Nia dehan, literasia dizitalizasaun ne'e importante tebes, tanba ne'e husu ba ekipa husi STAE atu utiliza tempu ho di-di'ak hodi bele aprende no halo mudansa ba servisu iha futuru.