Servisu Migrasaun Loke Prosesu Ba Sidadaun Estranjeiru 32

Servisu Migrasaun loke prosesu ba sidadaun estranjeiru hamutuk na'in-tolunu resi rua (32), tanba utiliza vistu turista hodi halo atividade komersiál.

Xefe Migrasaun Inspetora Adelaide de Rosa hatete, sidadaun hirak ne'e kaptura liuhusi servisu operasaun rutina ba iha otel no karoke sira iha Díli laran.

Nia dehan, operasaun ne'e konsege kaptura sidadaun estranjeiru hamutuk 32 no lori kedan ba halo identifikasaun iha migrasaun, no idenfika sidadaun hirak ne'e kontra lei no azilu migrasaun nian.

"Ita loke prosesu ba sidadaun estranjeiru na'in 32 ne'e, tanba utiliza vistu turista hodi halo atividade komersiál, ita konsidera ida-ne'e kontra lei migraun no azilu, tanba ne'e tenke prosesu tuir lei," nia dehan.

Nia dehan, prosesu kontinua ba Ministériu Públiku no aplika multa admistrasaun tuir lei migrasaun no azilu.

"Sidadaun estranjeiru hirak ne’e maiória utiliza vistu turista hodi halo atividade komersial, no vistu ne’ebé sira utiliza mate ona, maibé seidauk halo prolongasaun," Inspetora Xefe Rosa hatete.

Nia hatete, dadaun ne'e ekipa kontinua halo operasaun ba otel no karoke sira iha kapitál Díli hodi bele identifika estranjeiru sira ne’ebé mak sei viola lei migrasaun no azilu.

"Ita sei buka tuir nafatin, maluk estranjeiru sira ne’ebé servisu iha territóriu nasionál no vistu turistiku no pasaporte no viza sira ne’ebé mate ona," nia salienta.

Entretantu Prezidente Komisaun B Trata Asuntu Defeza Seguransa iha Parlamentu Nasionál Domingos Augusto "Deker" dehan, ekipa Servisu Migrasaun durante ne'e servisu di'ak, tanba kontribui reseitas ba kofre estadu.

"Ita husu governu tenke moderniza Servisu Migrasaun sira-nia servisu atu bele hafasil sira-nia servisu operasaun iha Díli laran tantu iha pontu entrada sira," nia hatete.