- Publika iha: 27 Novembro 2024
Autoridade Protesaun Sivil (APC) hamutuk ho World Food Programme (WFP) realiza Whorshop hodi hasae koñesimentu jestór sira-nian kona-ba oinsa atu mobilizasaun umanitária hodi responde ba problema Emerjénsia sira ne'ebé akontese.
Iha okaziaun ne’e Sekretariu Estadu Protesaun Sivil (SEPS), Domingos Mariano Reis hateten, lojístika umanitária hanesan elementu inportante ida, hodu bele kontribui ba preparasaun resposta no rekopera ba emerjénsia.
"Ita servisu hamutuk ho parseiru internasionál WFP ne'e kleur ona, tanba ne’e ohin ita hamutuk ho WFP realiza atividade workshop ida-ne'e atu oinsa bele hasae koñesimentu ita-nia jestór sira-nian kona-ba oinsa atu mobiliza umanitária hodi responde ba problema emerjénsia sira ne'ebé akontese," dehan Sekretariadu Estadu Protesaun Sivil, iha Hotel Novu Turizmu, Díli.
Nia hatutan, WFP hanesan parseru ida ne'ebé inportante tebes, tanba bain hira iha programa Emerjénsia ruma sira sempre ajuda.
"World Food Programme (WFP) ne'e parseiru ida ne'ebé di’ak tebes, tanba bainhira ita hetan dezastre ruma, ita husu ajuda ba sira, sira fó ajuda kedas," nia dehan.
Nia salienta, Timor-Leste risku dezastre ne'e barak loos, tanba ne'e APC nafatin servisu hamutuk ho ajensia internasionál sira atu oinsa sira bele nafatin ajuda.
Iha fatin hanesan Diretór Adjuntu husi World Food Programme (WFP) Admin Said hateten, Workshop ida hetan kolaborasaun husu Autoridade Protesaun Sivil hodi fehe koñesimentu kona-ba lojístika umanitária nian oinsa atu bele responde ba problema emerjénsia sira.
"Workshop ida-ne'e ho objetivu atu fahe koñesimentu ba jestór sira iha APC nian kona-ba lojístika umanitária nian kona-ba ouinsa atu bele responde ba problema emerjénsia sira ne'ebé akontese ho di'ak," nia dehan.