- Publika iha: 20 Novembro 2024
Kultura Tarabandu ne’ebé implementa iha Suku Bahalarawauin Postu Administrativu Viqueque, Munisípiu Vuqueque sai matadalan ba joven sira hodi hamenus konflitu iha Suku laran.

Xefe Suku Bahalarawauin Angelo Pinto hateten, tinan uluk bain hira seidauk iha Tarabandu, iha loron boot ruma joven sira sempre halo problema, maibé tinan ida-ne’e problema la iha.
"Kultura tarabandu ne'ebé realiza iha suku Bahalarawauin iha fulan kotuk, sai matadalan ba joven sira atu hadok an husi aktu krime sira, ita haree ba tinan hirak liuba joven sira iha Suku Bahalarawauin sempre halo problema, maibé depois ita implementa tiha tara bandu ba joven sira, tinan ida ne'e la iha problema ida," dehan Xefe Suku Bahalarawauin iha nia servisu fatin sede Suku Bahalarawauin, Viqueque.
Nia hatutan, Suku ida atu moris iha establidade no Paz presiza kontribuisaun husi joven sira, autoridade lokal sira tenke halibur joven sira, realiza atividade ou jogu ruma hodi halibur joven sira.
"Atu ita-nia suku ida-ne'e atu moris iha establidade no Paz nia laran, autoridade lokal tenke halibur joven sira hotu, realiza jogu sira atu nune’e bele dada joven sira,"nia salienta.
Nia haktuir, iha fulan hirak liuba, autoridade lokal sira halibur joven sira servisu hamutuk ho sira hodi realiza jogu lubuk ida.
"Iha fulan hirak liuba, hanesan 20 de Maio no 30 de Agostu autoridade lokal sira halibur joven hotu joven sira husi Suku Bahalarawauin hodi realiza jogu amizade, buat sira lao ho diak la iha problema ida mak akontese," nia esplika.
Iha fatin hanesan reprezentante Joventude Suku Bahalarawauin Tomas Alves haktuir, tinan uluk liuba kotuk, bainhira iha loron boot ruma sempre mosu konflitu, maibé tinan ida-ne’e depois tau tia tarabandu konflitu la iha.
"Iha tinan uluk seidauk iha tarabandu ne’e loron boot hanesan finadu ho tinan foun ne’e sempre mosu konflitu entre joven sira, maibé tinan ida-ne'e la iha konflitu l, tanba Suku Bahalarawauin implementa ona tarabandu," dehan Tomas.
Nia agradese tebes ba Xefe Suku Bahalarawauin ne'ebé bele implementa ona kultura tarabandu, no halibur ona joven sira hotu, hodi servisu hamutuk ba Suku Bahalarawauin no nafatin husu mos ba Xefe Suku no estrutura sira, atu nafatin servisu hamtuk ho joven sira hodi lori ba paz no establidade ba suku laran.