Quarta, Fevereiro 19, 2025

Presidente Konsellu Imprensa (CI), Otelio Ote dehan, liga ba akontesimentu sira ne’ebé akontese katak Autoridade Seguransa liu-liu Polísia sempre halo intervensaun ba atividade profissionál jornalismu nian iha terenu.

Presidente Konsellu Imprensa (CI), Otelio Ote dehan, liga ba akontesimentu sira ne’ebé akontese katak Autoridade Seguransa liu-liu Polísia sempre halo intervensaun ba atividade profissionál jornalismu nian iha terenu.

"Ita haree asaun Autoridade Seguransa liu-liu Polísia hodi halo intervensaun ba servisu jornalista nian iha terenu, ne'e ita lamenta no triste tebes, polísia hatene di'ak kona-ba Lei Komunikasaun Sosiál, tanba ne'e la merese halo asaun ida-ne'e hasoru jornalista," nia hatete.

Nia hatete, bei-beik ona polísia sempre halo intervensaun ba servisu jornalista bainhira akontese konfrontu ruma.

“Asaun sira hanesan foin lalais akontese negosiante sira ho ekipa husi Sekretáriu Estadu Toponomia no Organizasaun Urban (SEATOU) iha Kampu-Baru, jornalista hatudu ona ID Card ho Karteira Profissionál, maibé polísia nafatin hapara servisu jornalista iha terenu.

Lei la bandu jornalista halo kobertura iha fatin públiku, bainhira aprezenta nia identidade," Prezidente CI Ote dehan.

Nia dehan, asaun ne'ebé Autoridade Seguransa halo ba jornalista ne’e Konselho Imprensa (CI) Lamenta no la tolera atetudi ne’ebé akontese iha nasaun Demokrátiku iha konstituisaun RDTL iha artigu 40 ho 41 asegura ona.

Entretantu Komandante Operasaun Polísia Nasionál Timor-Leste (PNTL) Superintendente Xefe José Soares dehan, Komandu (PNTL) rekuñese sala ne'ebé ekipa konjunta husi Sekretáriu Estadu Asuntu Toponomia Organizasaun Urbana (SEATOU) ho Polísia nian hodi halo impedimentu hasoru servisu jornalista, bainhira halo atuasaun ba vendendor iha Kampung Baru ho Fatuhada.

"Aktu elementu Polísia ne'ebé fó seguransa ba ekipa SEATOU halo impedimentu ba servisu jornalista nia servisu iha tereinu ida ne'e sala," nia hatete.

Nia dehan, Estadu Timor-Leste, Estadu Direitu Demokrátiku ne’ebé mak hatuur ona iha 41 kona-ba Liberdade Imprensa iha Timor-Leste, PNTL, instituisaun ne’ebé impoin lei ho ordem, tanba ne’e iha obrigasaun tomak atu respeita no halo tuir, tanba ne'e membru PNTL sé de’it mak hela iha Timor-Lete husi ki’ik to'o bo'òt tenke fó espasu ba media sira atu hala’o ninia papél, hanesan jornalista .

“Polisia Nasionál Timor-Leste, rekuñese katak iha impedimentu ki’ik balun, hasoru jornalista sira iha terenu ne’e loos, saida mak membru PNTL sira halo ba jornalista ne’e sala kontra Lei Komunikasaun Sosiál nune’e mós konstituisaun”, dehan Koamdante Operasaun Superintendente Xefe Soares.

Nia informa buat ne’ebé membru PNTL sira halo, tanba sira la hatene kona-ba artigu hirak ne’ebé mak fó papél ba iha jornalista sira, tanba ne'e impedimentu ne'e akontese bainhira PNTL asegura seguransa ba ekipa SEATOU halo servisu iha terenu.