Quarta, Fevereiro 19, 2025

Rede Advokasia kompostu husi Fokupers, Alfela, JSMP, Y-HAK, PRADET, Rede Feto Timor-Leste, Casa Vida, no Uma mahon sira no seluk tan husu ba públiku atu kondena hahalok violénsia sira hasoru feto no labarik feto iha família no komunidade.

Rede Advokasia kompostu husi Fokupers, Alfela, JSMP, Y-HAK, PRADET, Rede Feto Timor-Leste, Casa Vida, no Uma mahon sira no seluk tan husu ba públiku atu kondena hahalok violénsia sira hasoru feto no labarik feto iha família no komunidade.

Diretor Ezekutivu Fokuper Domingas Afonso Amaral dehan, hahalok krime ne’e labele tolera no laiha razaun seluk atu ema ida halakon ema seluk nia vida, surpreza liuba bebé ne’ebé suspeitu halokon nia kaben no oan nia vida.

“Surpreza liu bebe ne’ebé inocente loos tenki mos simu aktu violénsia. Ami husu ba Públiku atu kondena hahalok violénsia hasoru feto no labarik- feto sira iha moris família, no sosiadade, tanba sira vunerabilidade no estatutu ne’ebé kbi’it laek.

Kazu violénsia liu-liu liga ba kazu laen oho fen no oan iha dia 20 Outubru iha Bekora, no kazu agresaun fiziku ba labarik feto idade 14 husi nia tiu no tia rasik to’o rezulta mate iha dia 11 de Outubru no akontesimentu seluk laen tan nia kaben iha fulan Setembru foin lalais,” nia hatete.

Nia hatete, públiku tenke hamriik iha vítima nia kotuk hodi kondena no fó apoiu tomak to’o hetan justisa ba vítima sira, se la’e hahalok sira-ne’e sai ona korente no tutan ba bei-beik ba feto no labarik-feto sira iha Timor-Leste.

Nia dehan,hahalok violénsia sira ne’ebé feto adultu barak tenki simu husi sira-nia parseiru moris no labarik-feto hetan husi familia rasik ne’ebé loloos tenki proteje, maibé agresaun violenta sira, estraga to’o hakotu sira-nia vida.

“Loloos uma no familia nu’udar fatin hafahe domin no hatudu inisiu respeita malu nian, sai tiha fatin fuik no laiha konfiansa no domin. Tanba ne’e Rede Advokasia lamenta no kondena makaas kualker aktu violénsia sira-ne’e nu’udar siklu violénsia ne’ebé kontinua,” Diretora Fokupers Amaral salienta.

Nia dehan, Rede Advokasia hakarak apela no ezije ba entidade no autoridade relevante hotu hodi luta ba Direitu Feto no Labarik-Feto no kondena hahalok violénsia hasoru Feto no labarik-feto sira.

Entretantu Xefe Departamentu Unidade Polisia Vulneravel (UPV) Superintendente Ricardo da Costa hatete, liga ba kazu violénsia ne’ebé laen halo ba nia fen ne’ebé ho kondisaun grávida iha Becora dadaun ne’e suspeitu Polisia halo ona prosesu investigasaun, hein deit aprezenta ba tribunal hodi kontinua prosesu.

“Ita husu nafatin ba parte família vítima atu koopera ho parte polisia hodi bele hafasili porsesu invetigasaun no lori autór ba prosesu tuir dalan legal hodi hetan justisa ba vítima, ita sei la tolera kriminozu ida livre nia tenke responsabilidade ba aktu krime nia halo,” nia hatete.

Alende ne’e nia dehan, liga ba akontesimentu sira-ne’e atu labele akontese tan, ema hotu iha obrigasaun parte estadu no igreza, sosiedade sivíl hala’o sira-nia servisu hodi bele prevene. Tanba ne’e ba oin presiza halo sosializasaun kona-ba lei númeru 7/2012 kona-ba Kontra Violénsia Doméstika ba sosiedade atu bele entende loloos.