- Publika iha: 11 Novembro 2024
Governu liuhusi Ministériu Saúde (MS) halo ona vasinasaun ba ema na'in atus haat limanulu resin neen (456) iha munisipiu haat ($) ne'ebé asu tata atu nune’e hodi prevene moras Rabies.

Nia dehan, dadaun ne'e Ministériu Saúde (MS) halo ona vasina kona-ba moras Rabies iha munisípiu haat (4), tanba iha RAEOA sidadaun ida pozitivu ona.
"Ita hala'o vasina ba moras Rabies ne'e iha munisípiu Covalima, Bobonaro, Díli nomós RAEOA, tanba ne'e totál ema ne'ebé simu ona vasina Rabies atus-hat-lima-nolu-resin-neen (456) ne'ebé hetan tata husi asu no sira ne'ebé simu imogrobina 38 pesoas.
Iha tinan ida-ne'e ema pozitivu ba rabies seidauk iha, asu tata ema ne’e iha duni ita komesa halo ona vasinasaun rabies nian ba ema sira-ne’e, karik asu tata ema, tanba tuir grau ne'e 2 ba leten ne'e presiza vasina," hatete Responsavel Programa Rabies iha Ministériu Saúde (MS) Aida dos Santos ba jornalista sira iha Hotel Novo Turismo, Díli.
Nia informa, Rabies nu'udar moras viral kontajiozu, no fatál la'ós de'it ba animál, maibé mós ba ema, tanba, moras raiva ne'e zoonosa, entaun Ministériu Saúde tenke fó vasinasaun ba ema ne'ebé asu tata.
Iha fatin seluk sidadaun Ina Maria dos Santos dehan, vasinasaun ba ema ne'ebé asu tata ne'e importante, tanba asu agora iha Sidade Díli mós barak tebes, maibé loron ida asu tata nia oan feto ba Sentru Saúde Comoro, sira dehan vasina ba moras Rabies iha, maibé ema laiha atu fó vasina, tanba ne'e husu ba Ministériu Saúde tenke koloka Ema iha Sentru Saúde ne'e 24 Oras.
"Asu tata ita liu 24 oras ne'e virus bele tama ita-nia isin, maibé momentu asu tata ha'u-nia oan atu ba vasina iha Sentru Saúde Comoro ema laiha atu fó vasina, tanba ne'e ita husu Ministériu Saúde tenke prepara pesoál ida hodi atende iha ne'ebá 24 oras. Tanba asu tata ema ne'e ita hotu labele hatene katak moras ne’e bele kona ita ka lae, maibé presiza halo tratamentu ba ema sira ne'ebé asu tata ne’e tanba ita mós hatene asu iha Díli laran ne'e barak ona," nia Informa.
Entretantu tuir dadus husi Ministériu Agrikultura Pekuaria Peska no Floresta (MAPPF) totál asu ne'ebé rejistu iha munisipiu tolu, inklui RAEOA hamutuk 49.963, kompostu husi Oe-Cosse iha 10.189, Covalima 7.104, Bobonaro 12.755 no Díli 19.915. Husi totál ne'e Ekipa halo ona vaksinasaun ba asu iha Oe-Cosse 7.334, Covalima 4424, Bobonaro 5659, no Díli 10.856.