- Publika iha: 24 Outubro 2024
Komandu FALINTIL-Forsa Defesa Timor-Leste F-FDTL demite ona membru ida husi vida Militár no fila ba vida sivíl, tanba komete iha kazu abandona feen ho oan.
Komandante Unidade Falintil Abel da Costa Xavier "Niki" dehan, membru ne’ebé mak komandu demite ne’e husi Unidade Falintil no diviza hanesna primeiru Cabo, durante ne'e nia feen hato’o keixa bei-beik ona no Komandu bolu atensaun ba nia katak haree rezolve problema tuir família nian, maibé realidade nia la halo tuir no nia feen halo keixa nafatin.
"Ho kazu ida-ne’e komandu konsidera katak, infrasaun militar, no prosesu liuhusi Xefe Estadu Maiór Jenerál Falintil-Forsa Defeza Timor-Leste (F-FDTL) Tenente Jenerál Domingos Raul Falur Rate-Laek no Vise-Xefe Estadu Maiór Jenerál Calisto dos Santos "Koilati" foti desizaun hodi demite membru refere husi militár ba vida sivíl," nia informa.
Nia dehan, desizaun hasai membru Unidade Falintil Cabu Fernando Soares ne'e, bazeia ba despaxu husi Xefe Estadu Maiór Jenerál F-FDTL Tenente Jenerál Rate-Laek no asina husi Vise-Xefe Estadu Maiór Jenerál Calisto dos Santos "Koilati", tanba ne'e desizaun sira hanesan ne'e sai ona laiha Militár ida atu kontra.
"Lei ne'e iha ita-nia leten, ne'ebé ita halo servisu iha lei nia okos, membru militár se de'it no ha'u hanesan Komandante Unidade FALINTIL no ami superior sira kontra infrasaun militár ne'e tenki sai, kuandu despaixu husi XEMJFA ita laiha komentáriu hanesan membru Unidade FALINTIL ida ne'ebé ita agora hasai ona nia boina," nia dehan.
Nia informa, demisaun servisu ba membru Unidade FALINTIL Cabu Fernando ida-ne'e sai hanesan lisan ida ba membru F-FDTL hotu espesial ba iha forsa Espesiais iha unidade FALINTIL, bainhira akontese problema koopera malu hodi rezolve, nune'e labele akontese tan.
Enkuantu Membru F-FDTL husi Unidade FALINTIL Cabu Fernando Soares orijen husi Munisípiu Manatuto tama iha Institutu F-FDTL- iha tinan 2011 halo separasaun servisu hasai fali ba vida sivíl iha loron 26/08 tinan 2024.
Entretantu Diretór Ezekutivu Fundasaun (FM) Mahein Nelson Belo dehan, membru F-FDTL sira ne’ebé mak durante ne’e komandu demite ne’e tanba iha kazu.
"Ita akompaña membru sira ne’ebé demite ne’e maioria, tanba kazu abandona familia, nune'e mós abandona servisu," nia hatete.
Nia hatete, ida-ne'e hakerek ona iha lei orgánika F-FDTL nian, tanba ne'e bainhira membru sira ne’ebé mak komete no la iha ona solusaun atu rezolve komandu tenke foti desizaun hodi demite.