- Publika iha: 22 Outubro 2024
Reitór Dili Institute of Technology (DIT), Salustiano dos Reis Piedade, hatete, lei baze supérior ne'ebé Ministériu Ensinu Superior Siénsia no Kultura (MESSK) estabelese liu-liu iha artigu 11 iha númeru 2 ne'e kontra Konstitusaun Repúblika Demokrátika Timor-Leste (K-RDTL).
Nia dehan, lei beze ne’e iha artigu 11 iha númeru 1 ne'e define katak língua ensinu ne'e tetum ho portugés, iha K-RDTL mós hatete katak língua ofisiál ne'e tetum ho portugés, iha lei baze edukasaun mós rekoñese katak lian ensinu ne'e tetum ho portugés, maibé MESSK halo fali lei ida-ne'e iha liña segundu ne'e polemika oituan.
"Ita haree iha liña 2 ne'e hanesan ita kontra tiha fali ita-nia Konstitusaun Repúblika Demokrátika Timor-Leste (K-RDTL), tanba dehan fali lian ensinu ne'e Portugés depois Tetum ne'e hanesan suporta, ida-ne'e mak hanesan ita halo lei ida kontra fali lei seluk, ne'e kontra entaun ne'e violasaun, tanba lei baze ensinu superior ne'e halo bazeia ba lei inan ne'ebé iha," nia hatete.
Nia hatete, nu'udar Timoroan sempre apoiu ba desizaun hotu ne'ebé governu foti, maibé molok halo desizaun tenke tetu halo didi'ak.
"Ita la iha duvida ba estabelesimentu lei baze ensinu superiór ne’ebé, maibé tenke tetu didi'ak lai tanba iha artigu balun la nesesáriu," nia informa.
Nia dehan, antes ne'e, lei baze ensinu superiór Prezidente Repúblika (PR) promulga ona iha loron 17 Jullu 2024, iha artigu 11 iha númeru 1 hatete, lian sira husi instrusaun no hanorin iha ensinu supérior maka Tetum no Portugés.
Nia fundamenta, artigu 11 nia númeru 2 hatete, la ho prejuizu ba dispozisaun sira iha númeru anteriór, lian prinsipál instrusaun, ensinu no peskiza iha ensinu superiór mak portugés, no tetum tenke uza hanesan linguajen ne'ebé apoia. No iha númeru 3, estadu tenke valoriza no dezenvolve lian tetum, hodi tau iha konsiderasaun ho hanoin atu uza ida-ne'e hanesan lian prinsipál ida ba instrusaun, ensinu no peskiza iha ensinu supérior.
Entretantu Ministru Ensinu Superiór Siénsia no Kultura (MESSK) José Honorio da Costa Jerónimo hatete, lei baze ensinu superior ne'ebé MESSK estabelese ne'e la kontra Konstitusaun Repúblika Demokrátika Timor-Leste (K-RDTL).
"Tanba lei baze ensinu superior ne'e aprova globál iha Parlamentu Nasionál no hetan promulgasaun husi Prezidente Repúblika, ha’u la fiar Prezidente Repúblika la lee depois mak aprova de'it. Tanba se kontra K-RDTL, la promulga," nia dehan.
Tanba ne'e husu ba ensinu superiór sira liu-liu Dili Institute of Technology (DIT) tenke lee didi'ak no komprende didi'ak nia konteúdu, labele haree de’it artigu ida depois tau ba kestaun ne'e labele.
"Lei ne'e la'ós regula de’it DIT lae, maibé ensinu supérior iha Timor laran tomak," Ministériu MESSK Honório informa.
Tanba ne'e nia dehan, antes estabelese ne'e konsulta ona ho reitór sira, DIT mós partisipa, sira tau kestaun ba iha artigu ida koalia kona-ba peskiza nian, sim iha lei ne'e tau Portugés primeiru tetum apoiu, tanba Portugés iha rekoñesimentu internasionál tetun seidauk iha rekoñesimentu internasionál, tanba ne'e mak tau tetun hodi apoiu ba peskiza ne'e.