Ai-Funan Nia Folin Bele Suporta Oan To’o Hetan Grau Lisensiatura

Elvina da Silva Gonçalves hela iha aldeia Ramelau suku Manleuana, nu’udar inan ida ho oan na’in neen (6), fa’an ai-funan iha merkadu Manleuana hahú husi tinan 2014 to’o ohin loron hodi bele suporta oan sira eskola.

Nia dehan, fa’an ai-funan iha merkadu hahú kedas husi uluk to’o ohin loron, la haree ba folin ka la’e, obrigatóriu faan loron-loron hodi bele hetan osan.

“Ha’u hahú fa’an iha ne’e iha tinan 2014 até agora, ami fa’an iha ne’e husi dadersan to’o lorokraik fila ba uma, iha tempu di’ak ema tama mai sosa, tempu la di’ak ema la sosa, maské loron ida ema la sosa, ami nafatin hein iha ne’e husi dader to’o lorokraik, tanba ida-ne’e maka ha’u-nia servisu, nu’udar inan tenki halo servisu ne’ehodibele hetan osan,” dehan inan Elvina iha nia fatin negósiu, Manleuana Díli.

Nia hateten, husi negósiu ne’e osan ne’ebé hetan husi folin ai-funan nian hatudu rezultadu di’ak, tanba nia oan na’in rua bele eskola to’o gradua.

“Sirana’in-rua eskola to’o gradua ne’e, lori osan folin husi ai-funan nian mak fó eskola ba sira-na’in rua, osan iha, tau hamutuk uitoan-uitoan hodi suporta sira ba eskola, balun uza hodi sosa hahan, balun uza ba halo lia,” dehan Inan ne’e.

Nia hatutan, agora ida servisu no forma ona familia, maibé na’in haat sei eskola hela, maske oan hetan ona servsiu, maibé labele depende liuba nia, tanba nia iha oan.

“Tempu di’ak bele hetan to’o $100.00 sira ne’e, se tempu la di’ak ema sosa ho folin $20.00 dala ruma laiha, ami fa’an ai-funan balun ho folin ne’ebé karun husi $70.00 ba to’o $100.00, tanba bazeia ba ai-funan nia kualidade, tanba vazu boot mos ami sosa, rai metan mós ami sosa, ai-funan mós ami sosa,” dehan nia.

Nia husu ba oan sira tenki esforsu aan ba estuda hodi bele hetan servisu di’ak iha idaidak futuru.

Iha sorin seluk, estudante husi Universidade Nacional Timor Lorosa’e (UNTL) Zejuinha Ana Sarmento deklara, nu’udar joven ida orgullu tebes ho sakrifísiu no asaun pozitivu sira ne’ebé inan sira halo ba nia oan sira.

“Ha’u-nia haree ba inan sira-nia asaun ne’ebé luta, liuhusi negósiu ki’ik hodi haree ba nia oan sira ba eskola to’o nia oan sira gradua, senti apresia loos ba inan lutadora ne’e, maske tenki sakrifika nia aan maibé nia esforsu no interese ba nia oan sira-nian futuru.

Nune’e husi asaun ida-ne’e inspira ha’u oinsá atu agradese ba esforsu ida-ne’e no motiva ha’u oinsá ha’u bele badinas aprende, tanba inan sira sakrifika sira-nia aan mai ita, ita nu’udar oan tenki halo saida mak bele halo sira kontenti,” nia hakotu.