- Publika iha: 21 Outubro 2024
Organizasaun Mundial Saúde (OMS) apoia Ministériu Saúde (MS) no Ministériu Edukasaun (ME) hodi dezenvolve pakote kuidadu saúde primária ba estudante ensinu báziku sira hahú husi primeiru anu to’o nonu anu.
Iha diskursu ne’e Reprezentante OMS iha Timor-Leste, Arvind Mathur esplika, inisiativa ida-ne'e permite identifikasaun no intervensaun lalais, hodi promove dezenvolvimentu pozitivu no prevene rezultadu sira ne'ebé ladún di'ak.
“Organizasaun Mundial Saúde apoia ona Ministériu Saúde no Edukasaun hodi dezenvolve Pakote Kuidadu Saúde Primária bazeia ba eskola. Pakote ida-ne'e permite pesoál kuidadu saúde sira atu fornese triajen saúde no ezame fíziku ba estudante sira iha eskola ensinu báziku sira hahú husik lase 1-9,” Dehan Reprezentante OMS bainhira halo vizita ba eskola 10 de Dezembru, Comoro, Díli.
Nia esplika, programa integradu saúde eskolá rne'ebé aliña ho pakote ne'e, hatudu atividade sira hanesan tuir mai, triajen saúde, vasinasaun HPV, fahe ai-moruk lombriga no promosaun saúde foka ba saúde mentál.
“Timor-Leste ofisialmente vasina hetan ona HPV, tanba ne’e vasinasaun ne’e sei iha ninia programa imunizasaun rutina, tanba iha loron 19 fulan Jullu tinan 2024 ita halo ona lansamentu, programa ida-ne'e ho objetivu atu proteje feto no labarik feto sira husi kankru servisus,” nia haktuir.
Iha fatin hanesan Ministra Saúde Élia A.A.dos Reis Amaral hateten, programa ne’e hetan apoiu husi OMS, tanba ne’e Ministériu Saúde servisu hamutuk ho Ministériu Edukasaun atu oinsá bele dezenvolve di'ak liutan programa pakote kuidadu saúde ne’e ba eskola sira hotu liuliu ba eskola ensinu báziku.
“Iha IX Governu ne’e rasik ita foka liuba oinsá atu bele kuidadu saúde primária, kuidadu saúde sekundária, kuidadu saúde tersiária, entaun kuidadu saúde primária ne’e ita hahú mós husi pakote sira ne’ebé maka ita prepara ona nomós pilár sira seluk ne’ebé atu promove no proteje saúde mentál,” dehan MS Elia.
Nia hatutan, presiza atu buka hatene mós ambiente sira ne’ebé ladún saudável, tanba fatin sira hanesan bele kontribui mós ba saúde mentál, tanba ne’e iha pakote kuidadu saúde primária ida-ne’epresiza haree mós buat sira-ne’e, tanba problema saúde mental mós halo parte iha programa ne’e.