PN Husu Governu Tenke Tau Atensaun Ba Veteranu Defisiente Mentál

Deputadu Duarte Nunes iha Parlamentu Nasionál dehan, governu tenke tau atensaun ba veteranu sira ne’ebé mak ho kondisaun defisiente mentál hodi konsidera sira-nia kontribuisaun ba ukun rasik an.

Nia dehan, governu iha obrigasaun atu halo identifikasaun ba veteranus sira ne’ebé ho kondisaun defisiente mentál atu nune’e bele fó atensaun espesífiku ba sira.

"Ha’u hatene katak veteranu barak mak moris ho kondisaun defisiente mentál, ita husu governu tenke tau atensaun, atu nune'e iha sira-nia moris restu ne'e bele kman, tanba sira-nia sakrifisiu merese hetan ita hotu nia atensaun," Deputadu Nunes dehan iha plenaria komisaun permanente iha ámbitu komemorasaun loron Falintil Forsa Defesa Timor-Leste (F-FDTL) ba 49 iha Parlamentu Nasionál, Díli.

Nia dehan, labele tau atensaun de’it ba veteranu sira ne’ebé mak kondisaun di’ak, maibé tenke buka hatene mós sira ne’ebé mak ho kondisaun moral mentál, hodi fó protesaun ne’ebé seguru ba sira.

Entretantu Vise-Ministru ba Asuntu Parlamentar (VMAP) Aderito Hugo da Costa dehan, iha ona dadus liu-liu iha Munisípiu Manatuto Postu Administrativu Laleia Suku Kairui katak iha veteranus na’in 4 ka lima mak ho kondisaun defisiente mentál.

Nia dehan, atensaun husi governu no estadu kada tinan sempre fó atensaun ba sobre-vivente no asuain sira ne’ebé sei moris, ho sira-nia idade ne’ebé mak avansadu ona.

"Ita sempre fo atensaun no buat seluk mak ita fó apoiu sosial nafatin tau importánsia, no konsiderasaun katak eroi no asuain, ita tau atensaun hanesan ho veteranu sira ne’ebé kondisaun normál," nia informa.

Enkuantu nia dehan, governu mós fó boslu estudu hanesan jestu ne’ebé estadu halo hodi fó onra ba sira ne’ebé mate ona no sira ne’ebé sei moris, no faluk oan ki’ak sira atu kontinua iha atensaun husi estadu.

Alende ne'e nia dehan, dadaun ne'e governu kria ona ekipa ida hodi halo identifikasaun ba veteranus sira ne’ebé mak ho kondisaun defisiente mentál nune'e bele hetan atensaun husi governu.