Infraestrutura Eskolár Maioria Asesivel Ba Ema Defisiente

Koordenadór Rede Edukasaun Timor-Leste Coalition for Education (TLCE) Jose Monteiro dehan, tuir monitorizasaun ne’ebé sira halo kona-ba konstrusaun Infransturtura Eskolár rezultadu hatudu katak mioria asesivel ona ba ema ho kondisaun defisiente.

Nia dehan, eskola sira ne’ebé tama iha konstrusaun projetu komunitária ne'e fó prioridade ba ema ho kondisaun defisiente sira asesu.

"Ita dehan katak infraestrutura eskolár sira dadaun ne'e maioria asesivel ba ema ho kondisaun defisiente," nia dehan iha knar fatin Kaikoli, Díli.

Nia dehan, eskola sira ne’ebé mak konstrusaun foun ne’ebé hotu-hotu kompleta ho rampa eskolár, hodi fasilita estudante sira ne’ebé defisiente fizika bele utiliza ho kadeira roda tama no sai.

"Eskola sira ne’ebé mak ita haree la iha rampa ne'e, tanba nia konstrusaun anterior ka eskola antigu sira," Koordenadór TLCE Monteiro informa.

Alende ne'e nia dehan, dadaun ne'e la’ós infraestrutura eskolár de’it mak asesivel ba ema defisiente, maibé edifísiu públiku sira nune'e mós Uma Naroman ba Povu.

Entretantu Diretór Ezekutivu Asosiasaun Defisiensia Timor-Leste (ADTL) Césario da Cruz dehan, agradese tebes tanba projetu konstrusaun ba eskola sira Ministériu Edukasaun sempre fó prioridade ba asesibilidade ba ema defisiente.

"Dadaun ita-nia maluk defisiente ne’ebé asesu ona ba edukasaun 65 mak hala'o hela estudu iha eskola públiku sira iha territóriu laran," nia informa.

Nia dehan, estudante na’in-65 ne’ebé eskola iha sekundáriu jer’al públiku ho privadu balun nune’e mós na’in haat iha Universidade Nacional Timor Lorosa'e (UNTL), husi sira-na’in 65 ne’e feto 30 no mane 35.