Governu Garante Indimizasaun Ba Komunidade Afetadu ba Konstrusaun Kajerna PNTL

Governu liuhusi Ministériu Interiór halo ona levantamentu dadus ba rai hodi harii edifísiu ba Kajerna Polísia Nasionál Timor-Leste (PNTL) nian iha Ex-Asrama Brimob Kampug Baru, Comoro, no governu sei garante indimizasaun ba komunidade afetadu sira ne’ebé durante ne'e okupa área refere.

Ministru Interiór (MI) Francisco da Costa Guterres hatete, ekipa Ministériu halo ona levantamentu dadus no identifika rai nia lokalizasaun seidauk remata, bainhira ekipa sira determina ona no governu tun direita ba halo negosiasaun no apoiu indimizasaun ba komunidade afetadu sira, nune’e governu hahú halo konstrusaun ba Kajerna PNTL nian.

"Ita seidauk halo negosiasaun ho komunidade atu haruka sira hamamuk fatin, no ita garante indimizasaun ba sira mak ita haruka sira sai," niain forma.

Nia informa, tuir dadus ne’ebé iha, uma-kain hamutuk 184 no populasaun hamutuk 1106.

"Ita husu sira atu koopera ho governu, nune'e bele hamamuk fatin ne'e hodi konstrui kajerna foun ba PNTL hodi prepara ba rekrutamentu membru foun," MI hatete.

Nia dehan, rai ne'e hola parte ba rai estudu, maibé sei la haree ba ida-ne'e, maibé haree ba hira maka afetadu, aihoris no uma komunidade nian halo nia modelu oinsá atu nune'e bele selu indimizasaun bazeia ba buat hirak ne'e.

Entretantu Komunidade, Dinila Clau, husu ba governu tenke perepara fatin dignu ba sira bainhira atu hasai sira husi fatin refere.

"Ami mós koopera ho governu atu halo dezenvolvimentu iha rai ida-ne'e, maibé tenke halo tratamentu ne’ebé dignu ba ita-nia feto maluk sira, ita-nia oan sira, ba estudante sira ne’ebé kontinuadór futuru Timor-Leste nian, haree netik sira-nia oin, rona netik sira-nia halerik, sei la’ós ba imi atu halerik ba sé, atu halerik fali ho inimigu ida uluk hanehan ita," nia dehan.

Nia dehan, governu ne’ebé Lidera husi Permeiru-Ministru (PM) Kay Rala Xanana Gusmão tenke prepara uluk fatin dignu ba inan feto no labarik sira antes, muda husi hela fatin Brimob Kampug Baru Comoro Díli, atu sira bele hela ho seguru no asesu ba edukasaun.

"Ita luta para defende Povu,tanba ne'e ba nain ulun sira nu’udar povu koopera ho governu atu halo dezenvolvementu ba rai ida-ne’e," nia informa.

Alende ne'e husu mós labele uza forsa hodi hasai komunidade sira, maibé tenke trata sira ho dignu ho respeita direitu umanu.