- Publika iha: 16 Outubro 2024
Komandu Polísia Nasionál Timor-Leste (PNTL) hahu instala ona Institutu Ensinu Supérior Siénsia Polísia (IESSPol) iha Timor-Leste.
Komandante Komandu Pesoal no Formasaun Polísia Nasionál Timor-Leste (PNTL) Superintendente Xefe Arquimino Ramos dehan, kriasaun Institutu Ensinu Superiór Siénsia Polísia (IESSPol) iha Timor-Leste, bazeia ba lei, estatutu orgánika foun Polísia Nasonál Timor-Leste nian.
“Ita-nia estatutu no lei orgánika foun PNTL mak define no autoriza, ita tenke instala Institutu Ensinu Superiór Siénsia Polísia no Akademia Polísia," nia dehan.
Nia dehan, depois de instala ekipa nafatin, halo esforsu hodi kompleta kritériu 11 ne’ebé mak Ministériu Ensinu Supérior Siénsia no Kultura MESSK fó.
"Husi kritériu 11 ne’e, ida mak misaun no vizaun Institutu Ensinu Superiór Siénsia Polísia, kriteriu ida mak planu prioridade IESSPol ba tinan lima, kritériu ida seluk mak infraestrutura, liu-liu aula aprendizajen, fasilidade dormitóriu, inklui fatin ba desportu no rekursu umanu," Komandante Komandu Pesoal no Formasaun Superintendente Xefe Ramos dehan.
Nia dehan, tuir kritériu sira hanesan, rekursu umanu fatin mak uza edifisiu Sentru Formasaun Polísia ba Institutu Ensinu Superiór Siénsia Polísia, tanba sentru ne’e akreditadu ona husi Ajensia Nasionál Akreditasaun Akadémika iha tinan rua liuba. Kritériu hirak ne’e Komandu PNTL priense ona, maibé kritériu rua importante mak Komandu PNTL seidauk priense.
"Kritériu rua-ne’e mak hanesan autonomia finaseira no sustentabilidade ba iha Institutu Ensinu Superiór Siénsia Polísia.Tanba tuir lei orgánika no estatutu PNTL hateten kriasaun Institutu Ensinu Superiór Siénsia Polísia ne’e, tenke goza nia autonomia finanseira no institutu ne’e tenke garante ninia sustentabilidade ba nia ezisténsia," nia informa.
Maibé nia dehan, ba kritéria rua-ne'e dadaun ne'e Komandu PNTL sei esforsu makas hodi bele kompleta.
Entretantu Ministru Ensinu Supérior Siénsia no Kultura (MESSK) Jose Honório da Costa Pereira Jerónimo dehan, ba IESSPol ne’ebé Komandu PNTL loke, antes ne'e sira hatama ona dokumentu sira no prense kritéiru 11 kona-ba oinsa atu kria institutu foun ida.
"Sira hatama iha fulan Maiu tinan 2024 ne’e no husu autorizasaun atu loke Institutu Polísia nian ida iha Timor-Leste, no ita haree sira priense ona kritéira balun falta ida ka rua mak seidauk priense," nia informa.
Nia dehan, dadaun ne'e sira instala ona IESSPol, no nafatin husu depois de instala tiha tenke esforsu hodi kompleta tiha kritéira ne’ebé sira seidauk kompleta.