Florindo Reprezenta Agrikultór Husi Projetu Hadala Tuir Formasaun Iha Koreia

Florindo de Araujo hanesan agrikultór ida husi projetu Hadala munisípiu Aileu nian, sente kontenti, tanba nia ho kolega na’in-sanulu resin haat (14) bele hetan oportunidade husi projetu Hadala ne’ebé implementa husi KOICA hodi ba tuir formasaun kona-ba agrikultór iha Koreia durante fulan rua.

“Ha’u ho kolega na’in 3 maka reprezenta agrikultór munisípiu Aileu no kolega 11 husi munisipiu seluk, kontenti tebes tanba bele hetan oportunidade husi projetu Hadala ne’ebé implementa husi KOICA ka hetan ajuda husi governu Koreia ne’ebé servisu hamutuk ho Ministériu Agrikultura Pekuária Peska no Floresta (MAPPF) iha Timor-Leste.

Ami ba tuir formasaun kona-ba agrikultura nian iha Koreia durante fulan 2 no liuhusi formasaun sira-ne’e esperiénsia ne’ebé hetan, ami bele adapta hodi mai aplikza fali iha Timor-Leste hodi halo dezenvolvimentu ba setór agrikultura iha ita-nia nasaun rasik,” dehan Florindo.

Nia hatutan, iha formasaun ne’ebé tuir iha Koreia sira aprende buat barak kona-ba oinsá halo produsaun ba adubus orgániku nian no liuhusi esperiénsia sira-ne’e sira sei fahe fali ba maluk agrikultór sira iha Timor-Leste hodi bele tau importánsia ba setór agrikultura ne’e rasik.

“Iha Koreia ami halo prátika kona-ba agrikultór nian oinsá bele pontualidade ba servisu, prátika kee rai hodi tau humutuk hodi halo preparasaun ba kuda nian no buat barak tebes maka ami aprende no esperiénsia sira ne’ebé ami hetan husi ne’ebá, ami sei fahe ba ami-nia maluk sira hodi bele hasa’e sira-nia koñesimentu atu bele sustenta sira-nia moris husi agrikultór,” Tenik nia.

Iha sorin seluk Embaxadór Koreia Shin Man-Taek hateten, reprezentante agrikultór hamutuk 15 ba tuir formasaun iha Koreia hodi aumenta esperiénsia atu dezenvolve di’ak liutan setór agrikultura iha Timor-Leste.

“Iha semana hirak ba kotuk, reprezentante agrikultór husi Timor-Leste sira hamutuk 15 ba tuir formasaun iha Koreia no liu hosi formasaun ne’e hodi bele fasilita sira atu hetan esperiénsia di’ak liutan, hodi fila mai Timor-Leste bele aplika atu bele dezenvolve di’ak liutan setór agrikultura ne’e rasik,” Dehan Embaxadór Koreia Man-Taek.

Nia hatutan, sira ne’ebé reprezentante agrikultór Timor-Leste ba Korea hetan mós apoiu husi universidade iha Koreia.

“Agrikultór hirak ne’ebé reprezentante Timor-Leste ba tuir formasaun iha Koreia, sira hetan apoiu makaas mós husi YONGE University iha Koreia no esperiénsia ne’ebé sira hetan durante tuir formasaun iha Koreia maka ho ema Koreia rasik, troka ideia ba malu no koko oinsá atu halo simultansia kona-ba hola nain no ida faan nain, sira-ne’e atu eleva ka halo merkadu ne’e luan liutan,” Tenik nia.