CAC Husu Kargu Xefia Sira Utiliza Karreta Estadu Tuir Regra

Komisáriu Komisaun Anti-Korupsaun (CAC) Rui Pereira dos Santos, husu ba kargu xefia sira hotu tenke utiliza karreta estadu tuir regra, se la tuir regra sei submete ba detensaun.

Nia dehan, utilizasaun karreta estadu husi kargu xefia sira, dalabarak ona la kumpri resgras, tanba ne'e ba oin ekipa konjunta hetan, tenke halo prosesu no submete kedan ba sela detensaun.

"Ita husu ba kargu xefia sira hotu, bainhira utiliza karreta estadu, tenke kumpri regrsa kona-ba utilizasaun nian, no la kumpri ami submete ba sela detensaun, tanba dadaun ne'e Komisaun Anti-Korupsaun mós iha ona sela," nia informa.

Nia dehan, CAC simu informasaun barak ona, katak kargu xefia sira utiliza karreta estadu fora husi oras servisu, balun utiliza iha finde-semana ba pasa-ferias, festa no ba mekadu, ida-ne'e kontra regra.

"Ba oin ami la toleránsia ona, bainhira ekipa konjunta kaer, ami halo kedan prosesu no supmete ba sela detensaun no kontinua halo prosesu disiplinar," Komisáriu CAC Santos dehan.

Nia dehan, utilizasaun veikulu estadu nian, tenke iha oras servisu, fora husi oras servisu ne'e la autoriza, bainhira utiliza iha loron sábadu no domingu tenke iha guiade-marsa, se la iha signifika katak labele.

Tanba ne'e nia dehan, dadaun ne'e sira koordena fali ho Diresaun Nasionál Transporte Terrestre (DNTT), Polísia, Komisaun Funsaun Publika, Inspesaun Jerál do Patrimóniu Estadu atu bele halo kontrolu efitivamente ba veikulu estadu sira-nia sirkulasaun.

Entretantu Komandante Tránzitu Seguransa Rodaviáriu Nasionál Superintendente Asistente Luis da Costa dehan, durante fulan Jullu ne'e tránzitu halo cek-poin iha finde-semana ba karreta estadu no motorizada estadu iha pontu entrada sira.

"Ita konsege prende karreta hamutuk 15 no motorizada estadu 10, tanba halo sirlulasaun iha loron feriadu no la iha karta autoriza husi ministériu ne’ebé sira servisu ba," nia dehan.

Nia dehan, depois de tránzitu prende aplika nota infrasaun tuir lei kódigu estrada no hodi ba selu ida banku, maibé viatura hirak ne'e ekipa konjunta lori ba iha diresaun patrimóniu estadu.