- Publika iha: 21 Setembro 2024
Unidade Espesiál Polísia (UEP) laiha rekursu liuliu ekipamentu hanesan karreta patrollamentu no rekursu umanu hodi fasilita servisu ba kontrolu área risku sira iha kapital Díli.

Komandante UEP Superintendente Dameão Coreia dehan, Unidade Espesiál Polísia UEP sempre apoiu serguransa iha área risku iha Munisípiu Díli no munisípiu sira seluk ne’ebé mak identifikadu risku, maibé problema mak transporte no rekursu umanu.
"Ita hetan orden hodi apoiu seguransa ba área risku sira, maibé ita la iha rekursu emtermus de rekursu umanu no material liu-liu karreta patrollamentu hodi hafasil servisu intervensaun ba konflitu iha área risku," nia dehan.
Nia dehan, dalaruma akontese konflitu ruma atuasaun husi UEP nian tarde ne'e, tanba difikuldade husi transporte, no rekursu la sufsiente hodi destaka ba área risku sira.
"Durante ne'e ita sempre halo kontrolu hodi halo intervensaun ba iha área risku konflitu sira balun utiliza karreta, maibé kondisaun ladun di’ak no balun la’o ain de’it," Komamdante UEP Superintendente Coreia dehan iha knaar fatin Bairu-Pite, Díli.
Tanba ne'e nia dehan, preokupasaun sira-ne’e hato'o ona ba Komandante Jerál Polísia Nasionál Timor-Leste (PNTL) hodi tau iha prioridade para rezolve.
Iha fatin hanesan Komandante Jerál Polísia Nasionál Timor-Leste (PNTL) Komisáriu Henrique da Costa dehan, preokupasaun ne’ebé hato’o husi unidade sira komandu konsidera no aprezenta ona ba governu hodi rezolve.
Maibé nia dehan, kona-ba servisu operasaun hodi fó seguransa ba komunidade polísia nafatin hala'o orden ne’ebé mak komandu orienta hodi kontrolu área risku ho meiu sira ne’ebé mak iha.
"Ita husu unidade sira hotu liu-liu Unidade Espesiál Polísia (UEP) atu halo servisu intervensaun tuir orden komandu ho hatudu profisionalismu, maské iha difikuldade ba ekipamentu," Komisáriu Costa saliente.
Tanba ne'e nia husu ba UEP atu halo preparasaun ba servisu prevensaun konflitu iha área risku sira, hahú husi Munisípiu Díli no munisípiu sira seluk relasiona ho vizita santu Padre nian.