Quarta, Fevereiro 19, 2025

Komunidade Aldeia tolu hanesan, Aldeia Bosilae, Defadae no Makalira iha suku Macalaco Postu Administrativu Quelikai Munisípiu Baucau komesa ukun aan to'o ohin loron la asesu ba bee moos.

Komunidade Aldeia tolu hanesan, Aldeia Bosilae, Defadae no Makalira iha suku Macalaco Postu Administrativu Quelikai Munisípiu Baucau komesa ukun aan to'o ohin loron la asesu ba bee moos.

Xefe Suku Macalaco Estevão Salomão Martins Belo dehan, durante ne'e komunidade iha Aldeia tolu ne'e utiliza de’it bee mota hodi konsumu loro-loron.

"Komunidade iha aldeia tolu ne'e xefe família hamutuk 235 mak to'o ohin loron seidauk asesu ba bee moos," nia informa via-telefone.

Nia dehan, husi Programa Nasionál Dezenvolvimentu Suku (PNDS) ba ona iha suku Macalaco atu halo instalasaun bee moos, maibé iha aldeia Bosilae, Defadae no Makalira la iha bee matan hodi dada bee.

"Fasilidade bázika hanesan bee moos mak durante ne'e sai preokupasaun tebes ba komunidade aldeia tolu iha suku ne'e," Xefe Suku Macalaco Belo dehan.

Enkuantu nia dehan, iha suku refere la’ós problema de’it ba bee moos, maibé enfrenta mós problema estrada.

Tanba ne'e husu governu atu tau matan no rezolve problema sira ne’ebé mak komunidade suku Macalaco enfrenta.

Entretantu Ministru Obras Públika Samuel Marçal dehan, programa prioridade IV governu nian primeiru mak rezolve problema bee moos, eletrisidade no estrada ba komunidade sira iha territóriu laran.

"Problema bee moos ne'e rezolve liuhusi PNDS, balun ne’ebé seidauk resolve, tanba bee matan mak la iha no balun problema estrada, ita sei esforsu hodi rezolve, tanba tuir planu tenke finaliza nia instalasaun iha tinan 5 nia laran," nia dehan.

Tanba ne'e nia dehan, dadaun ne'e ekipa halo hela identifikasaun ba área hirak ne’ebé mak seidauk asesu bee moos no balun ne’ebé mak bee matan la iha ne'e, oinsa atu eduka komunidade hakiak bee atu bele hetan bee no halo instalasaun bee ba komunidade sira iha territóriu laran.