Quarta, Fevereiro 19, 2025

Ana Rosário Moreira da Costa dehan, nia triste tebes, tanba husik hela oan mane na’in-rua no nia kaben iha Díli hodi bá hala'o misaun hanesan profesora iha Ensinu Báziku Filial Darlau Leimea Leten iha suku Leimea Leten, Postu Admistrativu Atsabe Munisípiu Ermera.

Ana Rosário Moreira da Costa dehan, nia triste tebes, tanba husik hela oan mane na’in-rua no nia kaben iha Díli hodi bá hala'o misaun hanesan profesora.

Nia dehan, nu'udar inan sente triste tebes, tanba oan na’in-rua ne'e sei presiza tebes inan nia prezensa hodi akompaña.

"Antes ne'e ha’u hanorin iha Ensinu Báziku Sabraka Laran Díli durante tinan 10, no foin lalais teste ba professór permanente ne'e pasa no destaka iha Ensinu Báziku Filial(EBF) Darlau Leimea Leten iha suku Leimea Lete postu Administrativu Atsabe Munisípiu Ermera.

Ha’u nu’udar inan ida senti triste tebes bainhira husik ha’u-nia oan na’in-rua hodi hakat ba fatin destakamentu hodi hanorin estudante sira," nia hatete.

Maibé nia dehan, maské ho laran moras, maibé nu’udar manorin hakarak kontribui ba dezenvolvimentu Timor-Leste liuhusi área edukasaun.

“Iha oportunidade ne’e atan ha’u hakarak husu ba Ministériu Edukasaun karik bele muda fali ami ba ami-nia postu ne’ebé ami hela ba, atu nune’e ami fó tempu oituan hodi akompaña ami-nia oan sira ne’ebé ami husik hela, tanba nu’udar inan oan sira presiza tebes ami-nia prezensa, tanba kolokasaun ne’ebé koloka ha’u mai ne’e dook tebes,” nia informa.

Entretantu Ministru Edukasaun Interino Domingos Lopes Lemos dehan, destakamentu professór sira ba munisípiu ne'e, tuir dekretu lei kona-ba rekrutamentu nian.

"Dadaun ne'e sei labele muda fali profesór sira ne’ebé mak destaka ona ne'ebá sira nia munisípiu ka postu ba destakamentu ne'e tuir númeru profesór ne’ebé mak identifka ona," nia informa.

Tanba ne'e nia dehan, husu ba profesór sira atu aguenta lai ho situasaun ne’ebé mak sira hasoru no fó tempu ba ministériu hodi buka solusaun.