- Publika iha: 20 Setembro 2024
Xefe Estadu Timor-Leste Jose Ramos Horta aprezenta ba Xefe Estadu Vatikanu Sua Santidade Papa Francisco katak dokumentu fraternidade umana tau ona iha kurríkulu eskolár hodi hanorin ba estudante sira iha ensinu baziku tereiseru siklu iha Timor-Leste.

Nia dehan, Parlamentu Nasionál aprova ona dokumentu fraternidade umana ne'ebé asina husi Sua Santidade iha tinan 2019.
Alende ne'e nia informa, Governu mós aprova dekretu lei númeru 32 hodi aprova kurríkulu nasional ensinu baziku tereseiru siklu, hodi introdús dokumentu fraternidade umana, moral no étika, hodi hanorin iha eskola.
"Dokumentu fraternidade umana ita tau ona iha kurikulum nasional no sai hanesan matéria prinsipál hodi hanorin ba estudante ensinu baziku treseriu siklu iha Timor-Leste," nia dehan iha Palásiu Prezidensiál Nicolau Lobato Aitarak Laran, Díli.
Nia dehan, dokumentu fraternidade umana ne'e esensial tebes, tanba sai hanesan baze ba étika moral hodi forma foinsae sira moris ho respeita no hadomi malu iha sosiedade.
Entretantu Sua Santidade Papa Francisco dehan, valór ne'ebé joven sira atu aprende mak fraternidade, atu sira bele sai maun alin no la’ós sai inimigu ba malu.
"Valór tebes ba joven sira atu moris hadomi malu respeita malu iha sosiedade," Sua Santidade Papa Francisco dehan liuhusi mensajen ba foinsa'e sira iha Centro Convenções de Díli (CCD).
Entretantu estudente Ensinu Báziku Tereiseru Siklu Fatuhada Maria Renita Sequeira dehan, matéria kona-ba fraternidade umana ne'e hanorin iha eskola kona-ba lala'ok moris iha sosiedade oinsá atu bele respeita ema seluk, no labele halo diskriminasaun ba rasa no kór ka relijiaun.
"Hanorin oinsá atu respeita ema hotu no kuidadu dignidade umanu nian, tanba ne'e ha’u kontente tebes hodi aprende matéria fraternidade umana ne'e," estudante Renita dehan iha Fatuhada, Díli.
Nia dehan, espera katak estudante hotu bele aproveita matéria ne’e ho di’ak, hodi bele iha étika moral no respeita malu.